Aviya un ombre ke kada diya las demanyanikas le plaziya kaminar. Le plaziya kaminar en la shara. En kaminando obzervava su entorno, mirava los pasharos, oyiya sus kantes, mirava los arvoles, obzervava sus tronchos i sus ojas. Kada una oja estava diferente. Kada una oja teniya otra kolor de vedre. La una estava redonda, la otra kon puntas. Se namorava de la natura. Tomava muncho plazer.
Un diya, en kaminando en la shara vido un kokon de papiyon. Estava meneyandose. Al pareser ke aviya un papiyon ke estava para salir. Ya savemos ke los papiyones, despues ke salen de los guevizikos, tienen una forma de guzano i se embolven kon sus salivas formando un kokon. Despues, kuando es el tiempo de salir, ampesan a burakar este kokon i de aya salen en forma de papiyones. Estos papiyones ke mos namoramos de sus kolores i sus elegansyas.
Se aserko de este kokon i ampeso a observarlo. Oras enteras se estuvo aya mirando. El papiyon de aryentro estava penando para salir. En vezes se kedava, parese ke se kansava. Despues ampesava de muevo a lavorar. Vido el ombre ke no estava salyendo, penso ke no teniya fuersas. Disho en si, le ayudare para ke salga una ora mas presto. Ampeso a agrandeser el burakito i en su opinion le ayudo a ke se salve de aya.
De esta manera el papiyon salyo fasilmente de su kokon. Kuando salyo teniya las alas arugadas i enfruzidas. El ombre penso ke el papiyon se va arepozar un poko i despues de eskansar va ampesar a bolar. Ma se yerro. El papiyon dainda no estava pronto para salir. Mizmo su puerpo estava seko. Aviya salido antes de su tiempo.
El papiyon se esforso, se esforso ma no puediya avrir sus alas i bolarse. El poveretiko se estava arastando en basho.
El ombre kon toda su buena voluntad le kijo ayudar para fasilitar su ovra, ma aviya una koza ke no saviya. El esforso del papiyon para salir es para ke el likido o el sumo ke tienen en sus puerpos, se vayga a sus alas i a las piernas para ke se enforteskan. I ansina kuando sale de su kokon esta pronto para bolar.
Este egzemplo mos amostra ke si keremos bolar kon muestras alas, sin tener menester de otros, kale ke penemos i kale ke kombatemos kon las difikultades.
