Henri kerido, bendicha madre ke te metio al mundo, tu de buena umor, seriozo, intelijente, pozitivo, supites prokurarmos el sol briyante i el ayre fresko de la primavera, mos dates un oksijen profondo.
Enaltesites muestro grupo ”Şalom Ladino Yazarları”, supites responder a los ke pretendiyan “Judeo-Espanyol no puede bivir”. Les dishites “Va turar lo ke va turar, muestro grupo es un grupo sinsero, i yo los va apoyar tambien, por la razon ke amo muestra lingua ansestral.
No mankates de Amaneser, fue un mirakolo de konoserte. Kreimos djuntos i desinimos un tablo figurativo maraviyozo, i sovre todo, pushates los jovenes komo ti a partisipar a muestra lingua ke estava “En veilleuse” komo dizen los fransezes.
Realmente tu umanidad mos fasino, mos eskrivites, bushkates a mostrar tus emosiones i fantazia, fuites un kolaborador ekstraordinario. Orozamente ke te konosimos i tambien onorates muestra komunita Judia de Estambol, Turkia.
I te asiguro, kerido kolega, ke nunka los rezultados de tus esforsos konsernando muestra lingua Judeo-Espanyola no desparesera. Mos permetites de respirar la manseves i suetamos ke tu ijo ke tanto amimos, kontinuara a segirte i espero ke ASHEM te aresivera en Ganeden i ke mos veras de los sielos.
