Ya lo se muy byen ke del Todo Poderozo no se demanda deke. Porke grandes son sus echas i muy fuertes; te echas enaltesido i te alevantas abatido. Ma yene en vezes mos revoltamos i dizimos deke.
De las oras ke tomi el haber de la muerte de HENRİ ÇİPRUT, esto dizyendo deke deke… en avyendo en el ospital hazinos i byen vyejos ke keren murirsen. Deke un mansevo mos desho la buena vida? Komo dishimos echas del Dyo, koza save.
A Henri (yo lo yamo Henriko) lo konosi en el Sentro Sefaradi en un Diya de Ladino. Mos aviya dado una konferensya enteramente en Ladino sin papel en la mano, la verda dizere, ke no pensava ke un mansevo de esta edad avlava tan ermozo esta lingua. De akel diya endelantre, empesimos a lavorar endjuntos. En las reunyones, kon sus ideas muevas mos arelumbrava i kon su saverisyo de la teknolojiya mos deshava enkantadas.
Para los diyas del “Ladino Day” topar manseves ke avlan Ladino es una koza kaji emposivle. Por siguro ke lo aferimos i de vista lo tomimos al grupo “AMIGOS PARA SYEMPRE”. Tomo su rolo i komo konosiya la lingua, fue muy fasil para el de azer su rolo i parvino maraviya.
Al sigundo anyo siguro ke estava yene en la trupa. Tomo un rolo de una kriyatura de 10 anyos, kon su pantaloniko kurto i el chapeyiko (se vistyo chapeyo para ke no se le veya los kaveyos blankos) kon el topiziko en la mano no vos vash a kreer, sus amigos mezmo no lo konosyeron. En una shena deviya de kayerse en basho, en las provas lo aziya muy ermozo. Kuando salimos a la shena en la ora ke kaliya ke se kayga, se echo en basho komo un loko. Kuando eskapo el djugo lo vimos frotando los dizes; le demandimos, kualo tyenes, estas bueno, mos disho: "No ize rolo, me kayi de verdad!".
Este anyo el rolo t'estava asperando Henriko, mos deshates guerfanos. Ma no mos vamos olvidar de ti, de tu amor para la lingua djudeo-espanyol, de tu saverisyo de la teknolojiya.
KE TU ALMA KE REPOZE EN GANEDEN!
