Muestro kerido Henri, mos desho la vida buena tan presto i kon muncha tristeza.
Yo konosi Henri kuando era kriyatura. Komo era 5 anyos mas grande de mi, Henri frekuentava el klub Amikal abasho del Kal de Şişli. Amikal era al lado de muestro klub Or-Ahayim (KSYD) ke era por los mas chikos. Henri era siempre sonriente i tenia siempre istrorias interesantes a kontar. Kuando me fui a Israel para estudiar en la universita, ya peryimos el kontakto por munchos anyos. Pero el Judeo-Espanyol, komo diziya el, “su amante” fue un razon ke mos topimos endjuntos otra vez. Henri era muy korajozo, lavoro muncho para konstruir relasyones pozitivas kon la djente en Istanbul. Los proyektos komo "Yaşayan Kütüphane" i "Avlaremoz" no puediyan ser lo mizmo sin el. Henri estava uzando el Twitter para luchar kontra el antisemitizmo, prejuisios i dezenformasiones sovre los Judios. Era una estreya briyando del Ladino, de la kultura i del umanizmo en el Estambol kontemporano.
Kerido Henri, en uno de tu roportajes, dishites ke el Judeo-Espanyol es la lingua ke te konektas kon tus granpapas, espesiyalmente kon tu “nene.” Te kero dizir ke esta lingua sera muestra konneksiyon para siempre. La djente ke no tuvieron mazal de konoserte pueden ver tus videos en Judeo-Espanyol i ambezarsen la rikeza de muestra kultura komo lo kontates. Tu nombre va kontinuar a bivir sovre la fondasyon de edukasyon dedikado a tu nombre. Mozotros vamos a azer lo maksimo posivle para ke el Judeo-Espanyol biva para siempre komo lo kerias tu.
