Avlando Yaakov a la edad de 147 anyos i vyendose ke sus diyas se estan aserkando para murir, yamo a su ijo Yosef i le rogo de azerle un grande favor, de no enterarlo despues de su muerte en la tyera de Mistrayim, de yevarlo a la tyera de Kenaan i enterrarlo en la Meara ke estan enterrados sus avuelos, Avraam i Yitshak. Yosef djuro de azer el komando de su padre.
Despues un syerto tyempo, estando hazino Yaakov, fue Yosef kon sus ijos a ver a su padre. Lo resivyo kon muncha onra i amistad. Lo bendisho a el i a sus ijos i les enkomendo ke se konporten de buena manera i kon amistad unos kon otros, i ke syerran a el Dyo Santo eyos i toda su famiya. Los bendisho a kada uno i uno sigun su meresimyento. I se espartyo Yaakov de este mundo.
La novedad de la muerte de Yaakov, se sintyo en todo el Ejipto, i su ijo Yosef, i todos sus ermanos, i toda la famiya yoraron i endecharon a sus padre. I todo el Ejipto se alimunyaron, i lo yoraron 70 diyas.
Pasando los 70 diyas de limunyo, demando Yosef lesensya de Paro de ir i yevar a su padre a enterrarlo a la tyera de Kenaan.
