Barbie se izo shirurjiena, astronota, prezidenta, la dushesa de Cambridge, varios personajes de "Mad Men" i todos los miembros de Destiny's Child.
Ma en en el empesijo en la Ferya de Djuguetes de New York, en el 9 de marzo de 1959, eya era solo una kukla kon un mayo enriva i una kola de kavayo, i kon antojos de sol blankos en la mano.
Sesh dekadas despues, kada minuto ke pasa mas de 100 kuklas, i kada anyo 58 miliones de kuklas se venden.
Komo puede ser ke la moda de Barbie no esta pasando? El mundo esta trokando i la moda de Barbie no esta pasando.
Segun Lisa McKnight, visprezidenta senior i direktora jeneral global de la marka Barbie, la kukla esta siempre popular porke "Barbie esta refletando la kultura i el mundo ke las ijikas estan viendo en sus anturaje".
El developamiento de Barbie es muy emportante por el sukse ke tiene.
Ruth Handler (nasida Rubenstein) en Denver, Colorado, era de una famiya de emigrantes judyos polakos.
Handler aviya obzervado ke a Barbara i a sus amigas les plaziya djugar kon kuklas adultas. Estas kuklas teniyan el puerpo feminino de las adultas.
Ruth i su marido teniyan una kompaniya de djuguetes, Mattel. Handler konvensyo su marido i el ekipo de desinatores de Mattel, a kitar una kukla mas femenina.
En el anyo 1957, Mattel kito una kukla kon un puerpo mas feminino. A esta kukla Ruth Handler le dyo el nombre de su ija, Barbie.
Barbie izo grande sukseso en el merkado, ma uvo djente ke pensaron ke una kukla ke tiene un puerpo feminino puede enfluensar negativamente las kreaturas chikas. Las feministas disheron ke Barbie es un objekto seksual, se viste komo mankena, i le plaze azer solo los echos de kaza.
Para efasar estos komentaryos negativos, Mattel empeso a prezentar munchos personajes segundaryos komo amigas de Barbie. Estos personajes teniyan diferentes profesyones; un atlet olimpiko, un pilot de la fuerza aerea, un proprietario de una butika, un desinator de moda etc. Estas kuklas todas nombradas Barbie, teniyan mas de syen profesiones en total.
La aktivista politika Susan Stern, en el dokumentario ‘Barbie Nation’, aviya dicho ke Barbie tiene una personalidad de una ija amerikana. En akeyos diyas, las mujeres deviyan ser seksual. Barbie nunka se kazo. Eya era una mujer de karyera ke le plaziya ser endependiente.
Barbie se izo mas popular entre las ijikas, no solo porke era buena i ermoza, sino tambien porke teniya profesyones ke estos diyas se konsideravan difísil para las mujeres, komo por egzemplo ser una astronota.
Kuando estas kreaturas se engrandesyeron, les kontaron a sus ijas komo Barbie enfluenso las kreaturas de akeyos diyas. Kon tiempo, Barbie evolusyono segun los enteresos de kada jenerasyon. Grandes nombres en la industriya de la moda empesaron a desinar para Barbie. Barbie empeso a viyajar a munchos payizes en lugares leshos komo Asia, Evropa, Afrika. Esto izo ke las kreaturas de estos paizes la konoskan, i ansi Barbie se izo famoza en el mundo entero.
I agora sesenta anyos despues, Barbie esta dainda famoza komo el primer diya.
