El filmo « THE CLUB » me izo pensar a la forma ke estamos vistos komo “Minoriya” o komo ”LOS OTROS” en Turkiya. El Djudyo en los Estados Unidos es en primero Amerikano, despues Djudyo. El Djudyo en Turkiya es en primero Djudyo, despues Turkano. El Turko es Turko no solo porke apartiene a la rama Turka ma tan bien porke es Muzulman. El Djudyo ni apartiene a la rama Turka ni es Muzulman. Entonses es “EL OTRO”. El Otro, mismo ke no seya i mismo kon una muy chika probabilidad, puede ser enemigo al Estado Turko porke puede kolaborar kon los poderes estranjeros. Por esto no vamos a ver ningún Djudyo en una pozisyon dominante komo governador, ambasador o djuzgador. Klaro ke lo ke digo no es solo por el Djudyo, ma por todas las otras minoriyas ke no son de relijyon Muzulmana. Así, puedemos dizir ke el elemento esansyel para ser Turko, no es la provenansya de la rama, ma la Relijyon Muzulmana. Dezde la epoka Otomana, puevlos de fe Muzulmana i de rama ke no es Turka, fueron asimilados; ama puevlos de relijyon non Muzulmana kategorikamente fueron konsiderados komo LOS OTROS, LOS ESTRANJEROS.
El Otomano dirijo su imperyo bazandose sovre doz umas (puevlos): La Uma Muzulmana i la Uma non Muzulmana. La tradisyon era de ver la Uma Muzulmana syempre superior a la otra Uma. Los “Otros” no puediyan tener kazas mas altas, no puediyan kavalgar sin permisyon, deviyan vistirsen de kolor diferente ke los muzulmanes i mas, i mas. Kon las reformas otomanas del siglo 19, todos tuvieron la igualdad de derechos nasyonal, siendo independente en sus derechos relijyozos. Kon la emigrasyon Muzulmana de los Balkanes, de Krimea i de los Kaukasos, la minoriya non Muzulmana apartuvo muncho mas a “LOS OTROS”. Esta apartenensya se firmo en el kapitulo 3 del Tratado de Lozan yamando MINORIYA solo los NON MUZULMANOS.
Las penas ke mos izyeron sentir i tanto sufrir kon la taksa del Varlik, kon las vente klasas, kon lo ke afito en Trakya, el vandalizmo del 6-7 Septiembre, todo esto izo parte de la mentalidad i del pensamiento por “Los Otros”. Aun oy, estamos konsiderados komo los OTROS. Kreyo ke ansi estamos vistos de la parte de la mayoriya, malgrado ke las leyes dizen ke semos igual.
Sentirse bien en muestro país kerido es lo ke dezeamos, sin olvidar de tener siempre el ojo bien avierto.
Siempre buena ventura, salud i pas para todos.
