Malgrado las yamadas de boykotes, la "Miss India" fue koronada komo "Miss Universo", en Israel.
Dia de Lunes, la Miss India, Harnaaz Sandhu fue koronada komo Miss Universo en un konkurso ke se realizo en la sivdad de Eilat en Israel. Esta kompetision fue markada kon las yamadas de boykotes para apoyar la kavza palestiniana.
La 70en Kompetisyon anual, ke se selebro por la primera vez en Israel tuvo ke kombatir kon la pandemiya de coronavirus, i en partikular kon su variante, Omicron.
Harnaaz Sandhu gano esta onor en depasando las Miss Paraguay, Nadia Ferreira i Miss Sudafrika, Lalela Mawane.
El ministerio sudafrikano de Spor, de Kultura i de Arte aviya insistido ke Lalela no se vayga a Eilat, en akodrandole la “dezgrasyas ke aze Israel kontra los palestinianos”.
Mizmo las organizasyones palestinianas izieron una yamada a las kandidatas de no partisipar en este evenimyento.
“Estamos insistyendo ke todas las partisipantes se retiren, para evitar una komplisidad kon el rejimen de apartheid de Israel i su violasyon de los derechos umanos de los Palestinianos.” Disheron en esta kampanya de boykotar Israel akademikamente i kulturalmente.
En una entrevista kon AFP (Agence France Press) en Yerushalayim, Miss Universe, Andrea Maza de Meksiko disho ke este konkurso deve de ser aleshado de la politika. “Miss Univers no es un movimiento politiko ni relijiozo” deklaro eya.
La Indonesia i la Malesia ke no tienen relasyones diplomatikas kon Israel, no mandaron kandidatas sozde por modo de las difikultades de la pandemiya.
Entre las kandidatas se topavan Miss Maroko, Kauthar Benhalima i Miss Bahreyn, Manar Nadeem Deyani, ke sus payizes aviyan normalizado sus relasyones kon Israel el anyo pasado.
Los Emiratos Arabes Unidos, ke tanbien normalizaron sus relasyones kon Israel i a donde el Primer Ministro, Naftali Bennett va azer una vijita istorika para Alhad, no mandaron una kandidata, por razon de “manko de tiempo”.
Las konkurentas ayegaron a Israel un mes antes i vijitaron lugares turistikos. Durante una eskala en la sivdad de los Beduines en Rahat, se vistyeron fostanes brodados i incheron ojas de parra. Los Beduines son un puevlo migrante ke apartienen a una komunita Palestiniana i son sivdadinos del estado Israeliano.
Estas kandidatas del konkurso deven de ser entre 18 i 28 anyos i no deven de ser nunka kazadas ni tener kriyaturas.
Esta seremoniya se vido por 600 milyones de personas en las televizyones de 172 payizes.
