Los Ejipsyanos, vyeron ke kon todo ke estan afriyendo a el puevlo Djudyo, kon esta fuerte i dura ovra, no estan puedyendo valir kon eyos. Kuanto mas los afriyiyan i apezgavan sus sirvimyentos en los kampos i en las kazas, mas se ivan muchiguando i enfortesyendo. Le dyeron avizo al rey para ke de una idea de ke manera valer kon este puevlo i atemarlo enteramente. Despues de azer un konsilyo sovre este echo, desidaron entre eyos, de azer matar todos los ijos ke nasen de este puevlo. I al punto mando a yamar Paro a las komadres kaporalas ke resivian a las parideras Djudias ke se nombravan Shifra i Pua. I les enkomendo ke kuando resiven a los nasidos de los Djudyos, si ven ke es ijo, ke lo maten sekretamente, i si es ija ke la deshen biva. I kon este envento pensaron de atemar a el puevlo Djudyo.
Pero El Kriyador no estuvo dakordo kon este mal pensamyento de los Ejipsyanos, i las dichas komadres espantandosen del Dyo Santo, no dyeron ninguna emportansa a la enkomendansa de Paro i arebivian a los ijos.
Paro no se deskorajo por esto de su negro penseryo, i sovre el konsejo de Bilam i del resto de sus savyos, se permetyo de enkomendar klaramente a su puevlo, ke todo ijo ke les nase a los Djudyos ke lo echen a el rio. I solo a las ijas ke las deshen bivas.
Estonses, uvo una diferensya de ideas entre el puevlo Djudyo. Uvo entre eyos ke se apartaron de sus mujeres por no ser kavzantes de matarlos a los ijos ke le van a naser. Pero uvo tambien personas ke no lo toparon esto de djusto i eyos aziyan su dover. Kuando viniya ora de parir sus mujeres, aziyan todo lo posivle por eskapar a sus kreaturas de la muerte. Kualos los eskondiyan en sus kazas, i kualos los deshavan en medyo los kampos enfiuzyandosen en El Dyo ke tendra sus kudyado.
Amram estava en la primera idea. Despues de averle nasido una ija nombrada Miryam i un ijo ke lo nombro Aaron, se espartyo de su mujer. Sovre el konsejo de Miryam, su ija, Amram tomo de nuevo a su mujer, Yoheved. Despues de 7 mezes en el 7 Adar de este anyo le nasyo un ijo, ke fue Moshe Rabenu.
