Noel se selebra el 25 de Disiembre. El 24, djusto a medya noche los Kristyanos van a la iglezya para komemorar el nasimyento de Yeshu, sus profeta. Esta semana, los relijyozos la observan komo relijyon i los ke no son relijyozos se dan regalos de parte a parte dizyendo ke son regalos del Papa Noel dekorando una rama de pino.
Desde syempre el diya mas kurto del anyo en el emisfero norte fue el 21 de Disiembre ke se yama también el solstis. En munchos payizes de la Evropa en estos diyas tan friyos, inkluzo los ke no eran muy poderozos, komiyan karne. Además el vino i la bira en estos diyas ya estavan bien fermantados i prontos para el konsumo.
Aze mas de 2000 anyos ke los Romanos selebravan una fiesta yamada “Saturnalia”, una fiesta a la onor del dyo Saturno ke se konsiderava komo el dyo de la agrikultura. Una fiesta ke durava kaji un mez kon bayles i kantes i los esklavos eran liberados por este mez. El 25 de Disiembre era el diya de nasimyento de Mitra, el dyo Sol de los Persas desde aze mas de 5000 anyos, i la relijyon de Mitra era la relijyon mas apresyada antes del kristyanismo entre los Romanos. En el siglo 4, kuando el Papa Julius desidyo de dar un diya de nasimyento a Yeshu, el 25 de Disiembre fue el diya mas apropiado tal ke ya era el diya de nasimyento de Mitra. De este modo la fiesta, al lugar de un mez duro solo 12 diyas eskapandose el 6 de enero. I el 6 de Enero fue akseptado komo diya de nasimyento por la iglezya ortodoksa del este.
No olvidar ke las fiestas kaji en todas las relijyones i puevlos, sirven para avrir los kaminos de unifikasyon i de pas. Ke el anyo muevo mos trayga Salud Buena, Felisidad i muncha Alegriya.
