Ya estamos serka de Purim. El Purim ke fiestamos kada anyo es el Purim de Ester i Mordohay, de Aman i Ahashverosh. Lo fiestamos el diya de 14 Adar. Dizen ke ay munchos otros Purimes komo el Purim de Saragosa ke se fiesta el 17 Shevat. Ma ay tanbien el Purim de Estambol ke no konosemos la data. Sera bueno de saverla, ke ansina puedemos tener otruna okazyon para azer una fiesta.
Aviya un grande Rabi, Moshe Amon ke era el mediko privado del Sultan Suleyman. En mizmo tiempo teniya el, muncha estima en los ojos del Sultan. Era komo konsejero suyo i lo respektava, no solo por su saviduriya ma tanbien por su persona. Despues de la muerte de Moshe Amon, su ijo Moshe paso a su lugar. El, ayudo muncho a la komunita judiya de akel tiempo i mizmo fundo una Yeshiva muy renomada. Aya fue traduzida la Tora en arabo i en persano.
Un diya el Sultan yamo a Moshe, estava muy triste i le disho. “Ay kuantas noches ke me esto espertando kon una boz de los sielos ke me dize de matar a todo tu puevlo. Malorozamente devo de akumplir este orden entre tres diyas, komo me vino de la parte de mi profeta”. Se enkanto Moshe i le respondyo: “Ke dizish mi Mayesta, no kreyash en este modo de esfuenyo preto, esto deve de tener una eksplikasyon. Asperá, pensaremos.” Salyo del palasyo i pishin arekojo a los judios de la sivdad en la grande sinagoga, les konto el kavzo i despues de azer una seduta larga, desidaron de azer taanit i ampesaron a azer orasyon de alma i de korason.
Al diya de muevo lo yamo el Sultan… le disho a Moshe “amanyana es el diya dalkavo, te kero muncho bien, te lo esto dizyendo para ke te fuygas.” Moshe le rogo de asperar otrun diya antes de dar el orden maldicho. Se fue a su kaza, aya ke estava penseriozo en supito oyo una boz “Shalom Aleihem”. Se le apersivyo un viejo kon una barva blanka larga ke le disho: "Mira, si no ay otra puerta ke se avre a la kamareta de echar del Sultan.” I se desparesyo en supito. Sin asperar, se fue Moshe pishin ande el Sultan i le demando si ay una puerta semejante. El sultan disho, “Ya ay una puerta semejante ke mas de mi dingunos no tiene haber de esto.” Sovre esto Moshe le demando permisyon de kedarse en la kamareta del Sultan noche entera. El sultan aksepto. Akeya noche Moshe no serro el ojo. Verso la demanyana se oyo una boz ke dava orden de matar a los judios. El Sultan se esperto i kon Moshe se fueron a akeya kamareta sekreta, avriyeron la puerta i ke ven? El Vezir ke era enemigo de Moshe i su puevlo porke se selava. El Sultan dyo orden ke lo enkolgen. Los judios se alegraron muncho por ke se salvaron i desidaron de fiestar este diya komo “Purim de Estambol”. I ken era akel viejo kon la barva blanka? Siguro ke, Eliyahu Annavi!
