Antes un mez tuve la okazyon de viajar a Hamburg para ver a mi ijo, ermuera i la inyeta.
“Hamburg” es la sigunda sivdad grande de la Almanya ke tyene un porto i es un metropol de la Evropa. Dos milyones de personas biven aki. Munchos turistos vijitan esta sivdad ke tyene una kultura rika. Es konstruida en el doredor del rio “Elbe”en el norte del pais. “El Lago de Alster” kon el panorama maraviyozo ke tyene, parese ke estamos en Venezia. La vida enriva i en el entorno del lago es muy biva. Ay munchos restorantes i kafes en el doredor, i munchas aktividades para azer en el lago.
“El Tunel de Elbe” es un lugar istoriko. Se konstruyo en el anyo 1911 para fasilitar la transizyon entre “St. Pauli” i el porto del sud. Si keremos pasar en frente sin mojarmos en el lago, preferamos pasar por “el tunel Elbe”. Es el primer tunel ke pasa debasho del rio, i tyene una atmosfera istorika.
“El Porto de Hamburg” es el simbolo de la sivdad, porke es kompletamente konstruido sovre los kanales naturales. Otro sembol de Hamburg es “Hafen City”, un lugar emportante kon sus edifisyos orijinales de kolores diferentes i munchos lugares enteresantes de vijitar. “El Museo de Kafe” de Hamburg kon su istorya espesyal, ke se topa en “Hafen City”, kon su koleksyon unika i kompleta es uno de los lugares mas populares para los amantes del kafe.
“Elbphilharmonie” es un edifisyo muy spesyal konstruido de una manera ikonika, una arkitektura ke atira la atansyon de las personas, lugar de kultura ande ay dos salones de konsertos, un otel i una rezidensya para los moradores…
“El Palasyo de la Munisipalidad” de Hamburg:
Este palasyo se konstruyo en el anyo 1886 en forma de
neo-ronesans. Oy en dia esta fonksyonando i kontyene el parlamento. Es una konstruksyon ke se konservo totalmente kon su arkitektura eksteryor i su struktura. Es un edifisyo ke kale vijitar. Un palasyo ke kontyene 647 kamaretas.
“St. Pauli” es una kaye animada, es el korason de la sivdad. La vida de noche, los divertimientos i las komidas spesyales… Todas las aktividades estan en esta avenida.
St. Pauli es el lugar ande ay munchos bares, klubes de noche, es un lugar sentral i tyene una struktura muy dinamika.
“Beatles Platz” es un lugar ke se topa aryento de St. Pauli, i tomo el nombre del grupo “The Beatles” ke es famozo en todo el mundo. Se topan las estatuas de los reprezantantes del grupo ke son, “John Lennon, Paul Mc Carney, Stuart Sutcliffe, George Harrison i Pete Best” en esta plasa.
“Fishmarkt” es un bazar ke es avyerto solo los dias de alhad i 70.000 turistos vijitan kada alhad aki. Es un bazar de peshkados, ma se topa frutas, legumes freskos i vistimyentas tambien.
“Blankenese” se topa en el doredor del rio “Elbe” i es un lugar kalmo, kon parkos naturales kon una vista maraviyoza ande moran los rikos de Hamburg. Blankenese es una rejyon ande se topa kazas de tavla de los peshkadores, i villas aryento de las vedruras, ke se konstruyeron antes de la gerra.
Finalmente este viaje fue para mi muy fruktuozo, seya por ayudar a los ijos, seya por kaminar esta sivdad maraviyoza.
