El muevo governo de Alemanya empeso su misyon despues de la direksion de 16 anyos del governo de Angela Merkel. Una koalision de sosyodemokrates (SPD), liberales (FDP) i vedres (Grüne) van a dirijir el pais en el futuro.
Olaf Scholz, ke era el ministro de Finansas i el ayudante del primer ministro Merkel, fue elejido el muevo primer ministro.
Komo politika eksterior, el muevo governo kere konstruir stratejia sovre reglas provadas: atamyento a Evropa, amistad kon Fransia, asosiasion kon los EE.UU, i la fidelidad kon la paz i kon el entendimiento en el mundo.
Bueno, komo el muevo governo va formar las relasiones entre Alemanya i Israel?
Israel i la Republika Federal de Alemanya tienen kontaktos politikos, ekonomikos, kulturales i de la vanda sosiedad sivil. Esta red fue establesida antes del 12 de mayo de 1965, el dia ke los dos paizes interkambiaron notas sovre el establesimiento de relasiones diplomatikas.
En agosto de este anyo, el futuro primer ministro Scholz adopto una pozision klara sovre Israel i ancheo mas el enterno ke Merkel aviya formulado. "Por modo de muestra responsabilidad istorika, tenemos fidelidad a la seguridad de Israel", disho Scholz al periodiko Welt. Scholz disho ke el se esta opozando al "komporto endjusto kontra Israel en la Unidad Nasional" i esta apoyando "los enteresos lejitimos de Israel".
La pozision de Israel tambien es klara. Jeremy Issacharoff, embasador de Israel en Berlin, metyo en el tweet una foto suya kon Scholz i eskrivio ke Israel "va kontinuar a lavorar para enforteser mas muncho la asosiasion stratejika kon Alemanya en todos los aspektos en benefisio de los dos puevlos".
La mueva ministra de Relasiones Eksteriores, Annalena Baerbock, aksanteyo el kontenido del akuerdo de koalision. "Para mi, la seguridad de Israel i el derecho de egzistir son parte de la razon de ser alemana", disho Baerbock en una entrevista kon el formato de diskusion Tacheles Arena del Konsejo Sentral de Judios en Alemanya en agosto de 2021.
Komersio: Alemanya es el asosiado ekonomiko el mas emportante de Israel en la UE, kon una soma komersial de $ 6,9 mil miliones (2019).
Los vehikulos en partikular, ansi komo los produktos de la industria kemika, makineria i instrumentos optikos, teknolojia de medisina: en estos espasios, Israel es el mas emportante partener de Alemanya.
Las eksportasiones a Alemanya (por valor de 1.800 miliones de dolares) son prensipalmente produktos kemikos i elektroteknikos, ansi komo produktos mekanikos i optikos. Estamos esperando ke las relasiones komersiales entre Israel i Alemanya van a kontinuar a enfloreser.
Militar: en oktobre del anyo 2021, aviones de la Fuerza Aerea de Israel i de la Fuerza Aerea Alemana bolaron enriva del Knesset en Yerushalayim para amostrar la kooperasion entre los dos paizes i sus fuerzas armadas.
Fue la primera vez desde la Primera Gerra Mondial ke aviones alemanes bolaron enriva Yerushalayim.
