El 13 Enero, diya de djueves despues ke me esperti resivi un telefon ande me estavan dando la negra novedad ke el Prezidente de Onor de la Komunidad Djudia de Turkiya, el sinyor Bensiyon Pinto mos desho la buena vida. Es vedra ke savia ke estava en el ospital i ke no tenia dinguna probabilidad de bivir. Ganeden bueno ke tenga. Asta los sinko anyos i medio dalkavos; mizmo despues ke desho el posto de prezidente mos ayudo en todos los kampos. Su buto era de ver una komunitad Djudia mas fuerte i mas ordenada. En mi artikolo en turko eskrivi munchas kozas sovre Bensiyon Pinto i sovre muestra relasyon. Sinkuenta anyos antes kuando empesi a lavorar para los Klobes de manseves, kreo ke Bensiyon Pinto era dainda aktivo en el Yıldırımspor. Anyos despues tuvimos la primera relasyon antes de kazarme. La Kisba ke fue reorganisada por Bensiyon i sus amigos deviya de taksar kada mansevo ke devia de kazarse. I antes de deshar su posto ayudando la Komisyon de las Bodas avlo kon mi para azer una taksasyon. I es este modo ke empesimos a tener relasiones los 44 anyos dalkavo. Bensiyon era un ombre muy enteresante. I tenia el koraje de avlar i de developar relasyones kon todo modo de personas. Es kon su punto de vista ke una grande partida de las personas ke posedan un posto ofisial o los politikos o las personas ke lavoran en las fondasiones de sosyetad sivil o mizmo jurnalistos de todas las vandas pudyeron konoser a lo manko los diridjentes de la komunitad Djudia.
Diya de Alhad fue la prova de esto. Dos ministros, el Governador i el Prezidente de la Munisipalitad d’Estanbol, syertos prezidentes de los distriktos de Estanbol; prezidentes de syertos partidos politikos estavan prontos en la seremonia de los funerales.
Es kon Bensiyon ke los dirijentes de muestra Komunidad fueron envitados komo ofisiales a syertos viyajes del prezidente, del primer ministro o del ministro de los echos estranjeros de muestro payis. Por la primera vez kreo ke era kon el viyaje de la Primera Ministra Tansu Çiller a Israel i a Gazza. Le plazia grupos anchos. Lavoro kon muncha djente i le plasia ke munchas personas tomen lugar en las fondasiones i asosasiones de muestra komunidad. No se lo ke es djusto. Oy en dia se aze totalmente de una fason diferente i ay muy poka djente ke lavora en las asosyasyones de muestra komunidad.
Tuve el mazal i las difikultades de ser Prezidente de muestra komunidad djusto despues de Bension Pinto. No esto azyendo dinguna komparezon. Ma munchas personas asperaron la mizma amistad de Bensiyon. Mizmo syertos grupos se kesharon de mi porke no estava tan intimo ke Bensiyon. No fue muy fasil para mi de dirijar este posto despues de un ombre komo Bensiyon.
Bensiyon era un ombre a ken le plazia ayudar a la djente. I topava el tyempo nesesaryo para realizar esto todo.
Ya se ke vamos a bushkar munchas vezes la kapachetad de Bensiyon kuando vamos a tener syertos problemes.
Kero ogurar mis sentimentos de kondoleensya a su esposa Eti, a sus ijos Benjamen i Hayim, a sus ermueras Megi i Nil i a sus kuatro inyetos.
Bensiyon ke tu alma repoze en Gan Eden.
