Por la primera vez, oyi esta kantika muy triste de la boz dulse de Yehoram Gaon. Aki esta:
Tres ermanikas eran, blankas de roz i ramas de flor
Tres ermanikas eran, tres ermanikas son.
Las dos eran kazadas, blankas de roz i ramas de flor
Las dos eran kazadas, la una se deperdio.
Su padre kon verguensa, blankas de roz i ramas de flor
Su padre kon verguensa a Rodes la enbiyo…
Ansina va kontinuando esta kantika ke konta la istorya de una mansevika “djahila”.
Kuando oygo esta kantika me viene al tino una vizina de mi chikes.
Kuando era yo chika, en el apartamento ke moravamos, aparte de un vizino ke era levanten, todos eramos judios. Enriva de mozotros morava una famiya ke no me akodro la alkunya. Madam Ventura i su marido, kon sus dos ijas Jana i Violet. Un diya, vino madam Ventura kon alkonfites, para anonsarmos ke su ija Jana se apalavro. Una alegriya en el apartamento. Se dio karar ke a la semana ke viene se van a espozar. El espozoryo iva ser en la kaza de Madam Ventura siguro. Asigun ke era el uzo de azer el espozoryo de la parte de la novya. Antes, todas las okazyones se aziyan en kaza. Komo espozoryo, fashadura, berit, pidyon-a-ben o vijola. Todas las vizinas endjuntos ampesaron a aparejar muncho bueno para el espozoryo. Por modo ke en el apartamento muestro aviya muncha ermandad. Todos los ke moravan aviyan vinido al apartamento kuando eran chikas i despues ke se kazaron kedaron aya, de sorte ke ya eran komo ermanas. Por egzemplo, mi mama teniya 8 anyos kuando entro al apartamento. Kuando se kazo, mi padre vino a morar aya porke mi gramama ya se aviya murido, i mi mama teniya una ermanika 10 anyos mas chika de eya. Esto akontesyo i a otros vizinos, ken komo meza-franka ken komo trokar de kat ke ansina todos eran amigos de siempre.
Ya se izo el espozoryo, ya se dyo hatima de boda i todo estava maraviya.
Una noche estamos oyendo gritos i yoros. Ma no vos puedesh imajinar komo. Todos los vizinos avyeron las puertas para mirar lo ke esta afitando. Vieron ke estas bozes estan viniendo de ande Madam Ventura. Suvyeron ariva, ke ven? Madam Ventura i su marido estan aharvandola a Jana. Kodja ijika estava yorando kon boz afuerte. Madam Ventura maldizyendola, el marido gritando i dizyendo “mos echates la kara en el lodo”. Neysa, los vizinos ampesaron a kalmar a los paryentes i a salvar la ijika de las manos de sus padres. Kurto, entendimos ke Jana kedo prenyada. Ke se va azer? Pishin kijeron tomar la boda a delantre. Esta vez, el novyo de Jana ke no diga, “Yo mas no me kero kazar kon Jana”. Se bozdeyo el espozoryo. Imajinavos akel tiempo komo se sintyo Jana, bevyo un kuti de hapes i se kijo matar. Del Dio ke la madre alkanso a tiempo, la yevaron al ospital. Despues se fueron ande el doktor Bayar, izieron un aborto. I despues de un mez se fueron a Israel. Komo dize en la kantika “kon verguensa”.
Ke istoryas ay en la vida….
