La Asamblea Jeneral de las Nasiones Unidas aksepto el 27 de enero (ke es el dia de la liberasion de Auschwitz-Birkenau), komo Dia Enternasional de la Komemorasion del Olokosto.
Akel dia, se komemora el jenosidio ke izieron los nazis, i ke rezulto en la muerte de 6 miliones de judios, 2 miliones de zinganos, 250.000 personas kon diskapasidad i 9.000 omoseksuales. Esta data fue fiksada por la Asamblea Jeneral de las Nasiones Unidas. La komemorasion tomo lugar por la primera vez, el 24 de Enero del anyo 2005, i se komemoro el sesenten aniversario de la liberasion de los kampos de konsentrasion nazis, i la fin del Olokosto.
En este dia anual de komemorasion, las Nasionas Unidas prevenio todos los estados miembros, a onorar las sesh miliones de viktimas judias del Olokosto i las otras viktimas del nazizmo, i a aparejar programes edukativos para ayudar a prevenir futuros jenosidios. Kon tiempo, las jenerasiones suksesivas se pueden olvidar del Olokosto. La memoria kale ke este vivante, para ke los mansevos no se olviden las sekanas del populizmo, el ekstremizmo, el rasizmo, la zenofobia, el nasionalizmo, i el antisemitizmo. Mezmo ke paso ochenta anyos del empesijo del Olokosto, dainda el antisemitizmo esta una menasa, komo testigimos en una sinagoga de Teksas, el mez ke pasimos.
Nunka mas! Esta fue la promesa de muestros padres despues de la Shoah. Este anyo el tema de la komemorasion i edukasion del Olokosto, es ‘Memoria, Dinyidad i Justisia’.
Guadrar el rekordo istoriko, akodrar las viktimas, gerreyar kon la negasion del Olokosto i demandar justisia despues de atrosidades. El tema kontiene estas ideas.
Para komemorar el 77en aniversario de la liberasion del kampo Auschwitz-Birkenau, Unesco esta organizando una seria de eventos. Por modo de las restriksiones del Covid-19, i para ayegar a odiensias globales, la majoridad de los eventos se van a realizar ‘online’. Va aver una seremonia de komemorasion i un panel de diskusion sovre la erensia ke mos desharon los artistos ke se murieron en el Oloskosto.
Kada anyo, en Israel, el 27 de Enero, a las diez de demanyana, una sirena de dos puntos marka el empesijo del diya de Yom HaShoah. Los israelianos, en el pais entero, deshan sus echos por un momento de silensio, por la memoria de los sesh miliones de judios eksterminados por los Nazis en el Olokosto. Los konduktores i las personas se aretan en medio de la kaye.
En el Knesset, los nombres de las viktimas se meldan uno a uno. Se mete rozas delantre del monumento del ‘Revolto del Ghetto de Varshova’, en Yad Vashem. Una noche antes, seremonias nasionales se azen en Yad Vahem. Un sovrebiviente asiende la flama del Olokosto. Sesh kandelas se asienden por la memoria de los sesh miliones.
