“I estos son los djuisyos ke ordenaras delantre de eyos”. En la perasha Mishpatim, meldamos los djuisyos ke nos ordeno El Todo Poderozo despues ke resivimos los dyes komandamyentos. El komentario Rashi eksplika este verseto dizyendo: “Komo los dyez komandamyentos fueron dados en el monte de Sinay, i estos djuisyos fueron dados en el monte de Sinay”.
La perasha empesa kon el sujeto de syervo Ebreo, “kuando kompraras syervo Ebreo, sesh anyos sirvera, i en el seteno saldra en libertad debaldes”. En el primer komandamyento de los dyez komandamyentos dize: “Yo so tu Dyo ke te kiti del esklavaje de Ayifto. Dunke tu deves ser esklavo del Kriyador i no de las personas”. Komo el diya de Shabat, nozotros repozamos i damos testimonyo ke El Kriyador kreyó el mundo en sesh diyas, i el diya seteno, fue un diya de repozo. Ansi el esklavo ke fue vendido deve de lavorar sesh anyos, i al seten deve tornar a su libertad. La perasha trata por una persona ke se kometyo de azer un rovo, i el Tribunal lo vendyo para ke pueda pagar su rovo. Dunke de aki se entyende ke no tuvo la posibilidad de pagar el rovo ke se akometyo de azer.
La Tora nos enkomenda, en esta manera un kavzo. A esta persona no se deve de konportar komo esklavo. I el es un ermano nuestro, deve de azer lavoros ke no es un ensulto para el i azerlo lavorar el diya i no la noche. Despues ke kompleto sus sesh anyos se deve dar su libertad. Este sujeto vyene a enbezar a nozotros, ke los ijos de Yisrael estuvyeron esklavos a Paro. El Kriyador nos kito de Ayifto i nos dyo a nozotros la libertad. Dunke nozotros somos esklavos del Kriyador i no las personas.
