Kuando se avla de la Shoa, una de las primeras kozas ke mos vyene al tino es el nombre Auschwitz. Auschwitz fue, i dainda es, el mas infamo i funesto de los kampos de konsantrasyon i de muerte fundados por los Nazis. Ma devemos de sinyalar ke Auschwitz no fue un kampo, sino munchos. Algunas seksyones eran kampos de lavoro forsado, otras partes se spesifikaron para prizonyeros de gerra (no djudios, ma Rusos o Polakos), i aviya Birkenau (tambyen konosido komo Auschwitz II), ke era el kampo de eksterminasyon de los Djudios. (en syertos tyempos i de non-Djudios).
El 27 de Enero de 1945, la armada sovietika arivo a las puertas de este infamozo kampo de eksterminasyon. Vos kero akodrar ke el komandante de la primera unita armada ke libero el kampo era un Djudio, Anatoly Pavlovich Shapiro, i ke el propryo avriyo las puertas de Auschwitz. Nada podria averlos preparado para las orivles kondisyones, los prizonyeros ambyertos i mal-alimentados o los orores inimajinavles ke deskuvriyeron. Kuando arivo la armada sovietika, aviya mas o menos 7.000 prizyoneros dainda en vida en el kampo. Los Nazis tomaron del kampo mas de 50.000 prizonyeros i los embiyaron a la fatal "marcha de la muerte". Mal-alimentados i sin fuersa para kaminar tantos kilometros debasho de inyeve, munchos muryeron en el kamino.
La liberasyon de Auschwitz fue un evento inkreivlamente importante. En rekonosimyento de este fakto, el 27 de Enero es agora data ofisyal del Dia Internasyonal de Komemoration de las Viktimas de la Shoa, sanksyonado por las Nasyones Unidas en Novembre de 2005, konforme a la Rezolusyon 60/7 de la Asamblea Jeneral. La rezolusyon, ke fue inisyada por el Estado de Israel, se akumplyo despues del 60en aniversaryo de la liberasyon de Auschwitz, komo un rekonosimyento de ke en una dekada, mas o menos, la komunidad de sobrebivyentes ivan a tener una edad alta i ya no podriyan partajar sus eksperiyensas. La rezolusyon 60/7 onora la memorya de las víktimas de la Shoa, refuza la negasyon de la Shoah, enkoraja la prezervasyon de los sityos istorikos ke verifikan las atrosidades i demanda de anchear la edukasyon sovre la Shoa.
No mos olvidaremos ke desde 1953, obzervamos un Dia de Komemorasyon de la Shoa spesyal el 27 de Nissan, Yom aShoa. Munchos djudios tradisyonales yoran a los ke perdyeron la vida durante la Shoa Tisha b'Av, el mueve de Av.
En la Turkiya, el 27 de Enero se empeso a komemorar desde el anyo 2011.
