La semana pasada tuvimos en Estambol una semana muy yelada. Kon inyeve fuerte. La meteorolojiya ya mos aviya dado haber de antes ma malgrado esto no se imajinaron tanto i todos ke salyeron al kamino kedaron en medyo del trafik yeno. En la inyeve los vehikulos kale ke tengan karuchas espesyales, o kale ke tengan kavenas para las karuchas. Ma dinguno no echo tino i se toparon sin aparejo. Tanbien la munisipalidad kedo en la klasa. En una karetera muy emportante dos grandes kamyones se arezvalaron i se chafteyaron. Siguro ke se serro el kamino. Uvo una kola larga larga de vehikulos ke se kedaron 10-12 oras aryentro la inyeve. Aviya hazinos i kriyaturas ma no aviya ni un otro kamino para salvarse de aya. No teniyan agua no teniyan de komer i tanbien el menester de ir a las tualetas.
Imajinavos ke un haham ke bive en Bnei Brak i ke kontrola el kasherut se kedo aryentro de este ginnam blanko.
Muestro amigo, Rafael Sadi mos konto ke este Haham, Israel Elbaum (61) kedo blokado aryentro de la inyeve i despues de 17 oras fue salvado por los askeres turkos.
El haham Elbaum salio al kamino kon un shoför Süleyman, estavan indo a enspektar una fabrika de asukar, para dar el sertifikado de kasherut.
“Ensupito ampeso una inyeve fuerte i kedimos en medyo del kamino. En primero vimos ke los kamyones serraron el kamino ma despues entendimos ke se arezvalaron i se chafteyaron kon otras arabas. Kijimos fuyirmos o tornar atras ma no reushimos i kedimos diez oras aryentro del taksi. Al empesijo mos kayentimos kon el klima ma despues mos espantimos ke no se eskape la benzina i serrimos el motor. Kedimos asentados otras 6-7 oras mas. Djusto al tiempo vinieron los polises i ampesaron a salvarmos. Mos dieron agua i sandviches ma yo no pude komer por modo de kasherut. Despues de tres oras, vinieron kon los kamyones i mos yevaron al lado del aeroporto aryentro de una meshkita grande. Aya estava kayente. Estava yeno de turkos ke me estavan mirando komo un gayo toaf. Ma dingunos no disho alguna koza. La demanyanika ize mi tefila. Ma me chekineyi de meterme tefilin porke no saviya si ivan a reaksyonar”. Ansina mos konto el Haham Elbaum este evenimyento perikolozo.
El haham Mendy Chitrik de Estambol disho ke uvo i otros israelyanos ke estuvieron aprezados en la inyeve. Estavan perkurando de prokurar komanya kasher a los ke demandan.
