Albert Bourla, direktor egzekutivo de Pfizer, fue nombrado ganador del Premio Genesis 2022, el premio yamado el "Nobel Judio". Bourla va empleyar sus ganansias para aparejar "proyektos para prezervar la memoria de las viktimas del Olokosto".
El premio, ke “onora las personas ekstraordinarias por sus grandes suksesos profesionales, sus kontribusion a la umanidad i sus atamiento a las valores judias”, se anonso los dias ke pasimos. El prezidente de Israel, Isaac Herzog va prezentar el premio a Albert Bourla en una seremonia ke va tomar lugar en Yerushalayim, el 29 de Junio.
“Estos dos anyos ke pasimos mos danyo a todos de maneras inkreivles. Durante este viyaje, mi fe judia fue mi prensipal giador. Es un grande onor ser nombrado ganador del Premio Genesis. Esto profondamente agradesido de akseptar este onor de la Fondasion del Premio Genesis al nombre de todos mis kolegas de Pfizer i los inkansavles sakrifisios ke izieron durante esta pandemia.
“Lo esto akseptando kon umilidad. Este premio es para mis colegas de Pfizer ke respondieron a la yamada urjente de la istoria en los dos anyos ke pasimos, endjuntos toparon remedio por el malor komun”, disho Bourla en una entrevista. “Me engrandesi en una famiya judia ke kreiyan ke kada uno de mozotros es fuerte komo el atamyento de muestra komunidad, i ke kada uno estamos prontos a reparar el mundo de vista ke el Dio mos yama. Me va ir a Yerushalayim para akseptar este onor en persona. Este premio semboliza la viktorya de la siensia i una grande esperanza para muestro futuro”.
"Esto remersiando la Fondasion Genesis por prezentar el fondo del premio a la Komunidad Judia de Tesalonika, en memoria de muestras viktimas, i ke es la komunidad a la kual apartengo yo".
"Munchos sovrebivientes del Olokosto nunka avlaron kon sus ijos sovre los orores ke pasaron porke era muy dolorozo. Ma mozotros avlamos muncho de esto en mi famiya. Avlamos de esto porke devemos akodrarmos de todas las vidas ke fueron pedridas i porke devemos akodrarmos de lo ke puede afitar kuando se permete ke el virus del mal se propaje sin kontrol. Me esto esforsando para bivir mi vida de akuerdo kon la erensia judia kon la kuala me engrandesi".
El Premio Genesis viene con $1 milion, i los ganadores de los anyos pasados, komo Steven Spielberg, Michael Douglas, Michael Bloomberg, Natalie Portman i Natan Sharansky, prezentaron estas ganansias a kozas filantropikas.
Bourla va prezentar la ganansia de su premio a tentativas komemorativas del Olokosto "espesialmente en la trajedia sufrida por la komunidad judia grega”. La madre i el padre de Bourla, (i los dos vinidos de Gresia), fueron sovrebivientes del Olokosto.
