Malorozamente las haberes negros se propajan muy presto. I fue la misma koza para la disparision del estimado Sinyor Sami Azar, ke fue presidente de la Komunidad Djudia de İzmir asta la mitad del anyo pasado. Era un ombre muy valutozo. Es kon el ke se desvelopo el proyekto turistiko del kuartier Djudio de Konak ante se topa ocho sinagogas. Sin tener el manadero nesesario para este proyekto, empesaron a realizar kon el Sinyor Nesim Bencuya ke reelmente reusho.
Ya se ke los anyos dalkavo, tuvo syertos problemes de sanedad. Ma alkanso a renovar la Sinagoga Shaar a Shamaim de Alsancak. El edifisio ke teniya syertos problemes de seguridad fue derrokado. I despues fraguaron una sinagoga de dos etajes i ensima unos kuantos etajes para la direksion de la komunidad i para las aktividades de las kriyaturas i de los mansevos. Era un ombre ke teniya una buena edukasion i tenia un buen echo. Malgrado ke el buro prinsipal de su echo era en Estanbol, su preferensia era kreo, de bivir en İzmir i los mezes de enverano en Çeşme.
No pude konoser su ija i sus ijos, ma fui envitado a su kaza i konosi su mujer, Stella. Es una mujer ke aresive muy bien sus musafires i ke save gizar muy savrozo.
Konosi a Sami kreo serka vente anyos antes kuando era presidente de una otra ovra. Konosia bien el inglez i esto le ayudo a tener relasyones internasyonales intimos.
Sus funerayes se realizaron diya de Alhad en el Simeteryo de Altındağ en İzmir. Malorozamente, no pude asistir a sus funerayes porke estava okupado kon mi madre. Esto transmetiendo mis sentimientos de kondoleensya a su mujer Stella, a su ija i sus dos ijos.
Sami, ke tu alma repoze en Gan Eden.
La semana pasada kuando estava en muestro muzeo, tuve la okazyon de egzaminar un kashon ande se topa djusto al lado de los dos livros, “Midrash Teilim", imprimado en 1493 en el Imperio Otomano (primer livro publikado en la primera kaza de publikasyon ke fue fondada por los Djudios Sefaradis ke vinyeron de Espanya” i el "Meam Loez". El livro el mas emportante para los Djudios Sephardis, el Meam Loez es las eksplikasyones de la Tora i en Judeo-Espanyol eskrito en letras rashis.
Topi tambien una bala de arvole de serka de 40 milimetros. I syertas eksplikasyones de un djugo. El djugo se yama “Karambol” i es muy enteresante porke este djugo lo djugan en el kazal Tire serka de İzmir i en syertos kazales de Espanya. I me ambezi ke son los Djudios Sefaradis ke trusheron este djugo de Espanya en el 1492 kuando vinyeron de aya. Mizmo ya me ambezi ke es un djugo komo el bilardo i ke se djuga komo el ma sin dingun instrumento. Los dedos son los enstrumentos nesesarios. I es en una vendida de livros raros ke topi el livro ke fue publikado por la munisipalitad de Konak sovre este djugo.
