El Olokosto mos ensenya mas munchas kozas aparte de lo ke afito durante esta katastrofa de la istoria umana. El Olokosto mos ensenya, de una manera klara, ke ay lisyones de ambezar. Lisyones ke todos, chikos i grandes, devemos ambezarmos. Komo lo izieron los aktores i los ke kolaboraron kon eyos antes de 1945, tambien tenemos "desiziones" de tomar kada dia en muestras vidas.
Komo en el Olokosto, los kolaboradores preferaron komportarsen negro kon sus amigos, sus vizinos, en dandolos en mano, oy tambien munchos mansevos estan amenasando sus amigos. Puedesh pensar ke esto es "inosente”, para el reseptor, esto es leshos de ser inosente. Ademas ay grupos ekstremistos, kometiendo teror en muestras komunidades. Deke? Porke no sos relijiozo. Porke sos de una relijion diferente. En otros paizes, porke tienes una orientasyon seksual diferente o porke sos de otra kolor.
Deke todos devemos estar klasifikados en diferentes grupos, en lugar de bivir todos endjuntos en un solo grupo yamado ‘umanos’? Despues de todo, la unika koza ke importa es si sos buena persona. Ke me importa tu relijion, tu kolor u tu oriantasion seksual.
Es apartir de la edukasion sovre el Olokosto ke todos puedemos ver de primera mano, a kualo puede yevar el odio, el rasizmo, el antisemitizmo i la intoleransia. Es kuando mos ambezamos el Olokosto ke puedemos ver, ke karar de danjorozo es de tener odio i prejudizmo. Puedemos ensenyar a muestros ijos ke no es djusto de pretender de no saver lo ke se esta pasando (komo munchos izieron despues de la gerra) o puedemos mozotros komo umanos, ensenyarles a azer lo ke es korekto para pueder detener el odio? Pueden los padres aprender a ser un mijor egzemplo a sus propios ijos, a no gritar i pelear kon los arbitros en los maches de futbol. Puedemos, komo adultos, ensenyar a muestros mansevos, ke es la toleransia, el respekto a los otros, sin emportar su relijion, su kolor u su orientasion seksual, es lo ke los va yevar a la reushita en la vida? Estos son muestros doveres komo padres. Estas son las lisyones ke todos puedemos ambezar del Olokosto: Tolerensia. Respekto a los otros. Kompreansion. Pasiensia. Estar allado del djusto. Ayudar al menesterozo. Es a traves las lisyones del Olokosto ke puedemos ayudar a muestros mansevos a ambezarsen estas lisyones de vida.
