Komo en munchas otras famiyas, el kafiko tiene un lugar emportante en muestra kaza. En la kultura turka el konkurente del kafe es el chay. Bien ke ya dizen ke “un kafe tiene hatir por 40 anyos”, yene el chay es otra koza. Mizmo kuando viene un kliente a una botika o un büro, pişin se enkomendan los chayes, se ampesa a azer un moabet kuyi i despues se avla por echo.
Ma el kafe es otro. Alora ke el chay es sirvido mas frekuentamente, el kafe es una marka de distinksiyon i de onor enverso los ke aresivimos.
El kafe tiene savores ke trokan a sigun el paladar del ke lo beve. Komo, sade (sin asukar), muy dulse o kon poka asukar. I esto se demanda antes de ir a aparejarlo. Kuando se ve una amiga dizimos, “ven beveremos un kafiko endjuntos”. O si keremos ver una amiga, le telefonamos i demandamos “tienes kafe?” Kere dizir “yo va vinir ande ti a azer moabet ke ya me eskarinyi”. Komo dizen en turko: “El korason no kere ni kave ni kavane, el korason kere un moabet dulse, i el kafe es preteksto”.
Ay rituales de ofreser kafe. Por egzemplo: Al musafir, antes de ofreser el kafe, se da un dulse o un bonbon o una chikolata ama en lo ke se va a una kaza de dolyo, se da solo un kafe i nada mas. Despues ke bevemos el kafe, dizimos “Kafes de alegriya”. El kafe se ofrese kon una kupika de agua al lado. Tanbien es de uzo de dar un lokumiko al lado del kafe.
En el tiempo de la primera gerra mondiala, kon un kafe turko se tiene aferrado un espion. Los turkos del saray teniyan uzo de bever agua, antes de bever el kafe. Un diya en un pranso del saray, vieron ke uno bevio el kafe i despues bevio la agua. Ya entendieron ke no era turko i lo aferraron i entendieron ke era un espion arabo.
Aparejar el kafe es muy emportante. Nunka se mete agua kayente en aparejando. Kale agua yelada i lumbre flaka.
Vos kontare un evenimyento del tiempo ke lavorava. En el büro teniyamos uno ke mos trayiya chay i kafe. Se yamava Shuayip. En vezes teniyamos reuniones kon 10-12 personas o mas. Lo yamavamos a Shuayip. El demandava a ken kere kafe o chay. El uno keriya kafe amargo el otro keriya muy dulse la otra keriya medyo dulse i ansina los trayiya. Dava a kada uno su kafe. Un diya le demandi: Shuayip efendi komo detienes en tino los kafes ke demandaron. Me disho: Yo los ize todos asigun lo beves tu. En esta reunyon dingunos no tienen ozadiya de dizir, este kafe no me plazyo. Se lo beven sin dizir un pi. Por esto no te merikiyes.
Tanto avlimos ke ya me vino gana de bever un kafiko. Vos kero konfiar ke ande mozotros es mi marido ke aze el kafe i lo reushe muy bueno.
Keridos amigos, “kafes de alegriya”.
