El 5 de Disyembre se komemoro el diya ke fue akseptado en Turkia el derecho ke se dyo a la mujer para pueder elijir i ser elijida. Un derecho ke las mujeres en munchos payizes lo tuvieron muncho mas después de la Turkiya. En muestro payis, esta ley fue akseptada en el anyo 1934; en Fransya en el anyo 1945, en Suisa en el anyo 1971.
Oy, bivimos orozos porke tenemos leyes ke mos protejan. En la antikuedad, la ley mas konosida es el kodigo del rey de Babilonya Hamurabi, ke bivyo aze mas de 3800 anyos. Su nombre sinyifika “Mishpaha Grande”. Eskrivyo sovre kontratos de lavoro, sovre patrones de tierra, sovre las relasyones familyales i mas, i mas. El total de las 282 leyes están gravadas en una Stela de Diorita: en lingua Akadyana ke era la lingua franka de akeya epoka. Este monumento de 4 tonas esta en el muzeo de Louvres en Paris, Fransya. Una tavliya de las kopyas ke se izyeron en barro, esta en el Muzeo arkeolojiko de Estambol, en la seksyon del “Oriyente Vyejo”.
Lo ke es enteresante, es ke este monumento fue topado en el anyo 1901 en Iran en la rejyon de Kuzistan por Jack de Morgan, un enjenyor de minas i arkeologo Fransez keryendo azer ekskavasyones en Sussa, la kapital Elamita ke se topa a 400 km de ande biviya Hamurabi.
A saver ke la ley de Hammurabi no es la ley la mas vyeja del mundo komo muchos kreyen, porke egzisten leyes ke se yaman de “Ur-Nammu” en Mezopotamya i ke fueron gravados aze mas de 4000 anyos. Algunas de las leyes de Hamurabi son paresidas a las de la Tora. I munchas leyes son de la kategoriya de “Leyes de Vengansa”, komo “Ojo por ojo, dyente por dyente”. Ay tanbyen leyes ke son progresistas komo la ley ke da el derecho al sospechozo de ser inosente antes de ser akuzado por su kulpa, o su delito. Otra ley dize ke si una mujer kazada muere, la dota ke eya aviya trayido kaye solo a sus ijos. Al empesijo de este monumento esta eskrito ke estas leyes se izyeron para protejar el oprimido de la violensya del fuerte i para protejar la bivda i los guerfanos. De toda forma este kodigo favoriza muncho mas el ombre ke la mujer komo el adulteryo de un ombre no se konta kulpa alora ke el adulteryo de una mujer se akava kon su egzekusyon.
Menos mal ke oy, la Ley de Vengansa no se ve kaji en dingún payis, ama ay lugares ande la vengansa se aze direktamente matando sin pasar por la djustisya, i ay lugares ande la djustisya yega tan tadre ke mos aze dizir, “Manko ke seya”.
Lo mijor es de tener syempre la konsyensya limpya i klara.
