Es diya de Djugeves ke empesimos en el Muzeo Djudio de Turkiya un proyekto sostenido por el Konsolato Olandezo. Se yama el Fondo Matra. Kualo es el titolo i el buto de este proyekto El buto es de azer konoser el Djudaismo, los Djudios del mundo i los Djudios Turkanos; sus kostumbres, sus manera de bivir sus orasyones, sus komidas, las sinagogas d’Estanbol…
Vamos a organizar 12 reunyones. I fui el primer a presentar lo ke devia. En primero, muestro amigo, İzak Eskenazi ke organiso munchos anyos estos kursos edukativos sovre el Djudaismo i sovre los Djudios, dyo detalyos sovre lo ke se deve ensenyar en este kurso edukativo. Tenemos dos seminarios: el primer para los giadores i el segundo para los elevos de Teolojia Muzulmana.
Mi sujeto era los Djudios Turkanos oy en diya kon sus institustones. En turko a los Djudios los yaman i Musevi, ke mi idea es ke no egziste un nombre asemejante ni es komo el nombre “israelite” ke fue empleado por los fransezes porke se empleava la ekspression “sale Juif” ma despues reusheron a no emplear este biervo. Ma no fue la mizma koza en Turkiya i en todas las korespondensias ofisialas vemos la palavra “Musevi”. Es la mizma koza en turko komo el fransez. Si mirash el diksyonaryo de la Institusion de la Lingua Turka, la eksplikasyon figurativa del biervo “Yahudi” es “espantozo/korkak” o “eskaso/cimri”. Oy en diya, komo la mas grande partida le los Turkos Muzulmanos ne konosen los Djudios ke son serka de kinze mil almas, no emplean mas estas ekspresyones. En mi karta de Identitad tengo el nombre de “Salamon” ke kon “Mişon” se empleava en todo modo de karikaturas antisemitikas durante los anyos 1930 i 1940, epoka antisemita i nazista. Todos mis primos trokaron el Salamon de sus kartas de Identitad. El uno se izo Metin, el otro Cem, el otro Selim… Yo so el eroe de muestra famiya no trokando el nombre de Salamon. Ma vos djuro ke no es mas un nombre komik porke no lo konosen. Ya les konti ke en el Djudaismo ay dos sektos: los Djudios rabinikos i los Karayes ke no akseptan los rabinos i el Talmud ke es la eksplikasion de la Tora.
Si, no ay una grande diferensya entre los Sefardim i los Ashkenazis. En pratikando ay syertas diferensias ma kreo ke no son muy emportantes. Ya savemos los Djudios Romaniotes ke bivyeron en estas tyerras durante el Imperio Bizantino. Oy en diya vemos Djudios Romaniotes mizmo en Gresia meldando el livro de Abraham Galante sovre los Djudios Turkanos, vemos ke las famiyas Galimidi, Politi, Pilosof, Stamati, Kalomiti, Kapsali, Kalo, Kosti, Yani… son famiyas de orijin Romaniotes. I tenemos los Djudios Mizrahis. Mizrahi en ebreo tyene la eksplikasion de “Oryente”. Los Djudios ke vinieron tornando de Babilon o ke vinieron despues de la destruksion del Templo por la segunda vez i ke no se fueron a la Espanya o a la Polonya son Mizrahis. Savemos ke los Djudios de Antep, de Antakya, de Başkale son Mizrahi i una partida emplean la lingua nomada Targum ke es enfluensada por el Arameo.
Komo estudiaron los Djudios Otomanos antes de la Eskola de Kamondo i las eskolas de la Aliansa? Se fueron en primero a las mestras de la maalle, despues se ambezaron a meldar en las eskolas ke se yamavan Heder o Meldar; i es despues ke se ivan a la Talmud Tora para ambezarsen la Ley Djudia. I los ke eran mas kapaches i intelijentes kontinuavan en las Yeshivas para azersen hazan, haham o personas para servir la Ley. Los otros a la kaye i este modo los Djudios ke savian munchas kozas kuando vinieron de Espanya despues de dos siglos i medyo se izyeron inyorentes; la mas grande partida no tenian un echo para ganar sus vidas. No vos va dizir los echos ke azian.
Vos konti una chika partida de lo ke konti durante dos oras respondyendo a todo modo de demandas. La seduta era organizada en dos seksyones i teniamos borekas, boyos i biskochos de raki ma kon chay en el antrakt.
La segunda seduta va ser sovre las valores Djudias i las tradisyones Djudias. Los otros sujetos va ser las fiestas Djudias; la kasherut i las komidas Sefaradis; la arkitektura de las Sinagogas en Turkiya, el Antisemitismo; el Olokosto; la istoria de los Djudios en Anatolia i en Estanbol …
Keriyamos 40 personas (giadores turistikos); i la kapachidad se incho solo en 8 puntos. Estamos lavorando para realizar un segundo seminaryo en este sujeto.
