Julio José Iglesias de la Cueva, konosido komo Julio Iglesias, es el artista latino i el kantante evropeo mas eksitoso a nivel internasional de todos los tiempos. Se estima ke durante su karriera dió mas de 5000 konsiertos i aktuó para mas de 60 milyones de personas en los sinko kontinentes. A lo largo de su karriera de mas de 40 anyos, enrejistró 80 albumes i kantó en 14 idiomas. Julio tomó munchos premios i rompió rekores mundiales dispersando la kultura espanyola en todo el mundo. Ma ay una koza ke pokos konosen: Julio tiene un atadijo djudio!
Nasido en la sivdad de Madrid en 1943, Julio Iglesias es el ijo grande del doktor Julio Iglesias Puga i María del Rosario de la Cueva y Perignat. Su abuelo materno, José María de la Cueva y Orejuela fue un jurnalisto konosido andaluz, i su abuela se yamava Dolores de Perignat y Ruiz de Benavides, natural de Guayama, Puerto Rico, kuando la izla apartenia a Espanya.
Segun tiene kontado el kantante a The Jerusalem Post en 2018, su madre Rosario de la Cueva tenia ansestros djudios i por esto la istoria de este puevlo siempre estuvo muy prezente en su vida kotidiana. El artista refleksiono estar konsiente de los lazos ke lo unen al puevlo djudio i ke el estudió todo sovre la inkisizion i la forma en ke munchos sefardis fueron ekspulsados de Espanya.
Desde siglos, kuando en Espanya se persegia a los djudios i eran ovligados a abandonar su ley, una parte de estos se eskondieron en kuevas. “La alkunya de mi madre, De la Cueva, viene de ayi.”
La istoria de Julio Iglesias me inspira a segir kantando i divulgando la kultura djudia i la kultura espanyola kon el mundo. Puede ser un diya Julio Iglesias podra meldar este artikolo i saver ke la komunidad turka sefaradi, los desendientes de los djudios ekspulsados de Espanya, tambien komparten el amor por el arte, por la vida i lo mas importante ke es kompartir el respeto kon personas de diferentes kreensias i kulturas. Este es mi kanto. Este es mi arte.
Clarice Prieto, mi profesora de kanto, lavora en un proyekto de Orkestra en las Eskuelas en la sivdad del Rio de Janeiro, Brazil. Kon el objetivo de dar oportunidad i una vida mijor a traves de la muzika a jovenes i sus parientes, Clarice i su ekipo djuntos kon el Konsulado Djeneral de Espanya en Rio son apoyados por el Banko Santander ke sige promosionando la kultura i arte en la sosiedad espanyola i brazilenya.
“Eu quero che tanto, e ainda non o sabes. Eu quero che tanto, terra do meu pai…” - Un kanto a Galizia (1972) es la kansion de Julio Iglesias ke mas me emosiona porke la letra es komo un kanto de mi korazon a Sefarad/Espanya. Esto profundamente agradesida al periodiko Şalom Gazetesi i a mis keridos lektores por poder ekspresarme artistikamente para vozotros.
Dediko este artikulo a mi famiya, a Isabel Perez Camilo, Gil Camilo i Cláudio Alberto Perez. Tambien a Antonio Perez, Martha Perez i a Valentina Perez, de bendicha memoria.
