Aze poko tiempo, aviyamos vijitado una ekspozisyon ke se izo en el viejo Kal de Zulfaris, mostrandomos los lugares ande bivyeron Djudyos en Turkiya de oy ke antes se yamava Asya Menor. Después del egzilyo de Babilonya, siertos Djudyos, al lugar de kedarsen en la Tyerra Santa, aviyan preferido de irsen a otras tyerras i establesersen en otros payizes. De sorte ke Asya Menor fue una tierra muy apresyada por munchos Djudyos de esta epoka i se izyeron parte de la povlasyon lokal manteniendo la kultura propria djudiya i probablemente mantenyeron el ivrit, el arameo o el grego de akeya epoka.
La mas vyeja eskrita ke tenemos de la prezensya djudiya en Asya Menor, es lo ke eskrivyo Shaul aze 2000 anyos. Shaul nasyo en Tarsus, un kazal de la sivdad Mersin ke esta en el sud de Turkiya al lado de la mar Mediterraneo. En esta sivdad enkontro Antonyo a Kleopatra, la famoza reyna de Ayifto, kon lakuala tuvieron una grande istorya de amor. Ansi este Shaul, nasido de una famiya pura Djudiya de la tribu de Binyamin, (El se da a konoser kon estas palavras) izo sus estudyos en Yerushalayim al lado del Rav Gamaliel, lavoro komo shastre para kuzir tentas kon ilo preto de kavras, i un diya troko su nombre de Shaul a Pavlos i después de la muerte de Yeshu, se izo el misyonaryo mas ardyente de él aun sin konoserlo. Komo buen Djudyo ke era, i para dar a entender sus ideas sovre su misión, izo viyajes kaji por toda Turkiya indose a las Sinagogas i predikar sus ideas. Kuando dizimos Sinagogas, entedemos ke son Keilas de las komunidades de Djudyos.
Todo esto lo savemos en las letras ke el eskrivyo a la komunidades. Eskrivyo también ke lo aharvavan en las Sinagogas por sus ideas estranyas. Por fin los Romanos lo emprizonaron i fue dekapitado (Kortar la kavesa) en Roma aun ke era un sivdadano Romano. Esto kontando esta istorya de Shaul porke esto mos da a entender ke Djudyos biviyan en estas rejyones de Turkiya aze mas de 2000 anyos. Oy los arkeologos toparon munchas pruevas de egzistensya de Djudyos sea en las pyedras tumbales, sea kon la Menora, sea kon restos de arkitektura tipika de Mikve i el gloryozo Muzeo de la Fondasyon de 500 anyos de los Djudyos Turkanos imprimo un livro muy reushido sovre estos lugares ande bivyeon Djudyos. El livro entitulado “La Identidad Djudiya Gravada en Las Pyedras”, i dedikada a Beki Kumru, kontyene estudyos elaborados de las Akademikas Siren Bora i İnci Türkoğlu; i de los Profesores Nicholas D. Cahil, Nevzat Çevik, Martin Seyer, Cristof Berns i Nadin Burkhardt.
