Keridos Lektores,
En el boletin de esta semana ke mos manda el Rabanut, el titro “Utiliza tu giador interyor” me entereso muncho i kije traduizirlo para partajarlo kon vozotros.
“Todos keremos azer lo ke es djusto en esta vida. Kuando mos espertamos i mos alevantamos las demanyanas, dingunos no dizen “yo kero ser malo, negro”. Malorozamente estamos bivyendo en un dor muy difisil i estan entendyendo todo inkorekto. Para entender kualo es bueno, kualo es negro no abasta de mirar a las normas. Kale azer lo ke es difisil para pueder topar lo djusto mozotros mizmo. Devemos de oyir muestra boz interyor. Agora una istorya del Talmud; Komunikar lo ke saves:
Antes de naser, kuando estavamos en la tripa de muestra madre, el Dyo mos embiyo un andjelo para ke mos ambeze todo lo ke ay en la vida. Djusto antes de naser, el andjelo toka muestra naris, i mozotros mos olvidamos todo lo ke mos ambezo.
Kualo mos ambeza esta istorya? Las verdades i las saviduriyas estan djusto debasho de muestras narizes. Puedemos ambezarmos de kualo se trata la vida en mirando aryento de mozotros, en muestros korasones. La sinyifikasyon de la vida es kerer byen i alkansar a muestro potansyel. Muestro dover es de yevar este konosimyento a muestro nivel de konsensya, i azer un esforso por akodrarmos de todo.
Esto es la vizyon de la edukasyon del djudaizmo.
Dingunos no mos pueden ambezar una koza mueva, solamente pueden akodrarte lo ke ya saves.
Mantyene tu rejistro limpyo. Kuando mos demandamos: Yo totalamente so onesto? i kuando respondemos ke si, tenemos una satisfaksyon muy grande. La konsensya es un faktor poderozo ke mos permete de ser onestos, kaminar por el kamino korekto. Kale oyir la boz de muestra konsensya. Kale detenermos kuando ayegamos a kualker desizyon. Si eskojites lo korekto te sintiras orozo.
Tener konfiensya, ser fiable es una parte emportante de la konfiensya.
En lugar de no puedo, kale dizir no lo va azer. No puedo kere dizir: yo no tengo la fuersa de azer lo djusto. Aserke, no lo va azer kere dizir: tengo el talento ma esto preferando de no azerlo.
Kuando keremos azer lo ke es djusto no toparemos ekskuzas.
Separar el byen del mal. El Talmud prezenta una situasyon komo esto:
Azer una lista de personas kon devdas non eskritas.
Ambezar a prioritizar los otros es emportante. No adoptaremos kon ojos syegos las verdades de las sosyetas.
Akumplir las obligasyones. Kerer byen las kritikas. Ser bueno sinyifika azer un favor al den frente. Verse a si mizmo komo una buena persona, es la nesessita bazika de los umanos. Es la baza de la oto-estima i la konfiensya en si mizmo.
Esto mos da la enerjiya vital, la enerjiya de bivir.
Azer buendad syempre da un grande plazer.
Azer lo djusto traye la felisita mas ke la reushita finansyera.
Para ser bueno, kale tomar plazer de la buendad.
Trayer al lugar las ovligasyones, es una eksperyensya spiritual.
Las ovligasyones son una parte endispansable de la vida, por esto kale tomar plazer de eyas.
