Si keres torturar un judio, azele dizir el nombre del Dio en ebreo
La madre de un estudiante de la segundaria de Tennessee disho ke en la klasa de Biblia la profesora izo komentarios ofansivos kontra los judios.
Juniper Russo kompartio en Facebook ke el profesor izo la traduksion de la palavra Dio, del ebreo al inglez i la eskrivio al tablo. Despues disho, ‘Si keres torturar a un judio, azele dizir este biervo en ebreo’. La madre de la estudiente eskrivio en facebook, ke la ija mas no kere kontinuar en esta klasa.
"Este nombre tradisionalmente no se dize a boz alta, tradisionalmente se eskrive solo en la Tora", eskrivio Russo. “Mi ija se sintio muy dezrepozada de oyer a una profesora ensenyar a sus elevos sovre 'komo torturar judios' i kuando vino a kaza de la eskola, disho ke no va kontinuar a esta klasa. La madre esta bushkando a ken kesharse sovre el kurso de la Istoria Biblika i segun los deskuvrimientos de esta analiza, va echar los pasos apropiados.
Russo disho que tambien denunsio este insidente a la Liga Antidefamasion.
Russo eskrivio en Facebook ke su ija se enskrivio a la klase de Biblia porke no podia alkansar a las otras klasas elektivas porke tiene una diskapasidad. La profesora les demandava kestiones komo: “Meldash la Biblia en kaza?”. La ijika se sintio mal, no kijo responder a esta kestion porke no keriya ser remarkada komo judia.
La madre disho ke ademas de los komanterios antisemitos, la profesora ensenyo la istoria de la Kreasion komo una istoria reel de komo se kreo el universo. La profesora tambien le konto a la klasa una istoria sovre un estudiante ateo ke "tomo la klasa para demostrar ke esto todo es inventado, ma despues de unas kuantas lisyones deskruvyo ke es verdad’.
Segun el program de la eskola, los profesores deven ensenyar a los elevos kon un punto de vista neutral i deven de suivar el plan ke tienen en la mano. Un profesor no deve amostrar a sus elevos sus propios opiniones o su predjudizmo, ni deve influensar los elevos.
Malorozamente el antisemitizmo esta mezmo en las eskolas. Komo estamos viendo en este eisidente, los profesores estan prontos a influensar los elevos sovre el antisemitizmo. El antisemitizmo se izo una hazinura inkurable.
