En pasadas meldi el livro de un eskrivano ke se yama “Abdulrazak Gurnah”. El fue rekompensado kon el Nobel de Literatura del anyo 2021. El livro se yama, “Korason de Arena”, i el sujeto me influenso muncho. Era ensima de emigrasyones.
A mi idea, el sentimyento de emigrar parese a luchar en unas tierras ke no se konose del todo. Deke, vash a dizir. Porke ya lo aprovi kon mis paryentes kuando teniya 13 anyos asta los 18.
La istorya de emigrasyones de la Turkiya es konektado kon su pozisyon en la jeografiya. En el oriente i en el sud de pais, afitan munchas batalyas i munchas situasyones sin stabilidad komo los paizes del Medyo Oriente. Paizes del Oriente kontra los paizes del Oksidente ke tienen nivel mas alto de prosperidad i de derechos. La Turkiya esta en estado de kyupri. Entre las dos partes, la Turkiya es el ponte de los paizes del Oriente, a los paizes de la Union Evropea.
Espesyalemente, la Turkiya fue una alternativa para emigrasyones ordenadas i dezordenadas.
En total, la Turkiya fue muy aktiva ekonomikamente i sosyo-kulturalmente i estas razones estan influensando la seguridad i las reglas del pais.
En la epoka Otomana los immigrantes fueron aresividos sin azer dingun apartamiyento, seya de relijion seya de rasa.
-En 1492, miles de Djudios vinieron de la Espanya
-En 1672, despues de la revolusyon Thököly, en 1699 el rey Ungaro Thököly İmre i la mujer fueron aresividos a las tierras Otomanas
-En 1709, el rey Sharl de Suesia se refujyo kon 2000 personas endjuntos.
-El rey Ungaro ll. Rakoczy Ferenc se refujyo en las tierras Otomanas.
-En 1830, despues de la revolusyon de Polonya, el fondador de “Polonezköy”, Prens Adam Czartorski se refujyo ayi en 1841.
-En 1848, el Prens Ungaro, Lajos Kossuth, kon 3000 personas se refujyo en el Imperio.
-En no siendo la istatistika muy djusta, entre 1856-1864, 1 500 000 soldados Kafkases se fuyeron de la armada Rusa i vinyeron a las tierras Otomanas.
-En 1917, despues de la revolusyon Bolshevika, el jeneral Wrangel demando abrigo kon 135.000 personas del Imperyo Otomano.
Despues de la fondasyon de la Republika Turka
-Entre los anyos 1922-1938, 384.000 personas vinieron de la Gresya
-Entre los anyos 1923-1945, 384.000 personas vinieron de los Balkanes
-Entre los anyos 1933-1945, 800.000 personas vinieron de la Alemanya.
-En el anyo 1988, 51.542 personas vinieron de Irak.
-En 1989, 345.000 personas vinieron de la Bulgariya.
-En 1991, despues de la gerra de Irak kontra Kuveyt i munchos otros paizes, 467.489 personas vinieron de Irak.
-Entre los anyos 1992-1998, 20.000 personas vinieron de Bosnia i en el anyo 1999, 18.000 personas vinieron de Kosova i en el anyo 2001, 10.500 personas vinieron de Makedonya.
-Finalmente entre Avril 2011 i Marso 2019, achakes de los embrolyos i batalyas de Siriya, 3,6 milyones de Sirianos se refujyaron en la Turkiya.
En resumen, del anyo 1922 asta oy mas de 6.5 milyones de djente se refujyeron en muestro pais.
Las razones de las emigrasyones en el mundo fueron de dos tipos:
1. Emigrasyones ovligatoryos komo gerras, desgrasyas i egzilos.
2. Emigrasyones voluntaryos. La razon de estas emigrasyones son desizyones individuales, para pueder tener una vida mas repozada.
Las emigrasyones las mas emportantes son las emigrasyones de meoyos ke es la ida a otros paizes de las personas ke tyenen kualidades altas en sus profesyones i karieras.
Keridos Lektores, por seguro ke este sujeto no se termina del todo, la kontinuasyon puedeser en las futuras semanas. Yo esto ogurando a los ke emigraron i a los ke van a emigrar ke tengan buena vida ande se van.
