Por el Dr. Selim Salti
Mi amigo, el avokato Yakup Barokas, viene de publikar un livro en turko entitolado TÜRKİYE ÜZERİNDEN YASADIŞI GÖÇ (Emigrasyon Klandestina a Traverso la Turkiya) ke konta el fakto istoriko de los djudyos mirando de eskabuyir de los nazistos biviendo en la Evropea oryantala. Rekordo muy importante dando a entender las difikultades kon las kualas estos poveretos miraron de fuyir de la muerte kon barkas primitivas a traverso la mar Preta i ayegar a la Turkiya, puerta de salvasyon.
La Turkiya komo se save, en akeya epoka se avia deklarada neutra, situasyon ke la avia metida en pozisyon difisil enverso la Almanya Nazista ke no keriya ke resiva refujyados fuyendo su rejim, mas espesifikamente los djudyos. Por esto, una de las razones del rejim diktatoryal de Ismet Inonu i de su governo era de nunka kerer achetar djudyos klandestinos arivando a las aguas turkas, a ke debarken i kontinuen sus kaminos a traverso el payis para pasar a la Siriya i de aya a la Palestina, debasho del Mandato Inglez.
Independientemente de la presyon almana, siertos de los dirijentes turkos eran simpatizanos del rejim nazisto i bastante antisemitos, los kualos de dinguna manera no keriyan ayudar a los djudyos etranjeros. Malgrado esta inimista, malgrado las difikultas de navegar en aguas danjorozas onde se undieron naves sea achakes de las kondisyones de mar fuerte o ke fueron atakadas por vapores de gerra, en el anyo 1940, la nave nomada Salvador salyo a kamino de la sivdad de Varna en Bulgarya verso la destinasyon de la Turkiya.
El livro konta ke este vapor en data del 12 de Desembre konteniendo 352 pasajeros se undyo serka de la sivdad de Silivriya a kavza de una fuerte tempesta, en la zona del promontoryo Djambaz. 127 okupantes se aogaron por no saver nadar o se muryeron entezados del friyo. 103 personas fueron deklaradas pedridas i de los ke se muryeron los 70 de eyos eran kreaturas.
64 anyos después de este evenimiento trajiko, 5 personas ke se podyeron salvar vinyeron a Silivriya afin de komemorar este aksidente funesto. En el livro se topa ademas el reportaj ke la sinyora Nelly Barokas izo kon estos sinyores en el anyo 2004.
Yakup Barokas en su analiza mos da a entender komo la manseves djudiya de Estambol se organizo para ayudar este trafiko de klandestinos en ayudando los emisarios venidos de la Palestina los kualos ovraron en silensyo, kon la komplisita de siertas otoridades turkas ke serraron los ojos i los desharon lavorar. Barokas mos ambeza todo esto de la boka de testigos ke bivieron en akeya epoka.
De otro lado Barokas mos aze saver en su egzamen, el komporto de vela aboltada de las otoridades turkas, kuando miravan de empidir el transito i kuando kooperavan i mostravan una sierta umanita sovre el pasaje de los djudyos klandestinos.
