Es la semana pasada ke izimos una reunyon en el zoom para dar karar kuando devemos de realizar el DIDL 2022 i ke modo. Dimos karar de azerlo via Zoom. Es djusto ke muestro kerido amigo, Henri Çiprut no esta mas kon mozotros. Ma vamos azer todo modo de esforsos para ke Henri no se averguense de mozotros. El era muestro amigo kon muncha saviduria teknolojika. Oy en diya reelmente no es muy fasil de pueder segir todas las muevas teknolojias. Aviyamos anunsiado ke este anyo esta aktivitad iva ser realizada al nombre de Henri Çiprut. Ya savemos ke mas muncha djente van a partisipar a esta aktivitad ma yo preferava una reunyon ande todos van a estar endjuntos en una sala.
El diya se va realizar el 20 del Marso 2022 entre las oras 15.45 i 18.45 porke no tenemos otra posibilidad. A las 19.00, va empesar el Enkontro de Alhad i si empesamos mas presto todos estan durmyendo en las Amerikas: en Dallas, en Seattle i otras sivdades. Esperamos ke munchas personas van a partisipar a este diya. No vos va dizir si es un diya maraviyozo o no. Es vozotros ke vash a dar karar.
La semana pasada uno de muestros prezidentes iguales me disho ke le demandaron ke la Komunidad Djudia tome la inisyativa para realizar un Sentro ande va organizar aktivitades para la konservasyon de muestra lingua Judeo-Espanyola, i para propajar muestra kultura sefaradi. Es un proyekto ke toma apoyo del EU.
Ya se ke es un proyekto ancho de punto de vista material. I kon muestro prezidente igual, İsak İbrahimzadeh, dimos karar de restorar la Sinagoga Selaniko ke es kompozada en tres edifisios, i azer aktivitades por este buto. Es siguro ke no es muy fasil de konservar un edifisyo asemejante ma kon el kafe ke vamos a realizar en uno de estos tres edifisios i kon konsyertos i otras aktividades, kon paras ke vamos a realizar vamos a pueder mantener este edifisyo.
Ya savemos ke este edifisyo apartiene a la Fondasyon de Balat i vamos azer todo lo menester para ke esta fondasion resiva una partida del revenido. Reelmente no es muy fasil de mantener estos edifisios. Mi idea es ke la Sinagoga de Selaniko ke se topa en un buen lugar deve de ser restorada.
De punto de vista turistiko, tenemos munchas sinagogas en Balat i Hasköy i todas deven de ser restoradas i devemos de organizar tures ke kontienen los dos kazales: Balat i Hasköy. Reelmente estos dos kuartieres fueron el korason de la Djuderia Otomana i Turka en el Imperio Otomano i en el empesijo de la Republika Turka.
Este proyekto va ser realizado por la Fondasion de los 500 anyos, la Fondasion de Balat, la Fondasion del Gran Rabinato i la Asosiasion del Sentro Sefaradi d’Estambol.
Espero ke este proyekto va ser achetado por los fondos del EU.
