La estorya de Ester fue el tema de munchos pintores olandezos en la istorya. Estas todas pinturas de los artistos esta trayendo al tino una kestion – ‘Deke los artistos ollandezos se enteresaron tanto en la estorya de Esther?’
Ay razones prensipales ke eksplikan sus entereso en la estorya de Purim. Rembrandt era personalmente fasinado por el Viejo Testamento. Komo el biviya en un kartie judio de Amsterdam, el se sintiya muy serka a los judios i a la Bibla. Kuando era chiko, su madre le meldava pasajes de la Bibla. Entremientes, Rembradt mirava a las fotografias del livro, arekojiendo enspirasion de la pajinas. Los dos Testamentos le prokuro sujetos para developar su talento artistiko.
En el anyo 1634, Rembrandt se kazo kon una mujer rika, i empesaron a bivir una vida rika. Se merkaron una kaza en el mas luksuozo kartie de Amsterdam. Rembrandt no teniya problemes ekonomikos, i no teniya menester de lavorar komo lo devian los otros artistos de su tiempo.. La rikeza de su mujer le dio la libertad de lavorar kon los estudiantes de arte en su studio.
Ademas, Rembradt tuvo una sempatia al judaizmo. A traves de su amistad i entimidad kon los mas emportantes personajes judios de Ollanda, Rembrandt empeso a enteresarse a la sinyifikasion profonda del Tanah.
En akeyos anyos, en Ollanda aviya una tolerensiya relijioza, i aviya munchos entelektuales judios. Las famiyas judias tenian ganansias buenas, i tenian el gusto de bivir. Los rikos davan grande emportansia al arte, i merkavan pinturas para dekorar sus kazas. Naturalmente, los judios preferavan pinturas bazadas en istorias tomadas del Tanah.
En akeya epoka, los judios portugezes aviyan fuyido de sus paiz, i aviyan trayido una grande kantidad de eksperiensia i konosimientos kon eyos a Ollanda. La Republika Ollandeza se aviya echo el paiz el mas floresiendo de Evropa, en los kampos kultural i ekonomiko. Los judios portugezes i espanyoles se enstalaron en Amsterdam, i ayudaron a enstalar la endustria de diamante en Amsterdam.
Komo los judios eran permetidos de pratikar sus relijion, eyos aziyan todos los servisios relijiozos, i teniyan todo modo de fasilidades en sus komunitades.
Esta libertad de los judios era totalmente diferente del estado de los otros judios ke bivian en otros paizes, i ke devian eskonder sus servisios relijiozos. Esta diferensia se viya mezmo en la arshitektura de las Sinagogas. En las senas istorikas de las pinturas no aviya kristianos krusifikados, Madonnas yorando, o judios mirandolos kon malisia, komo era en los otros paizes. Los judios ollandezos estavan puediendo topar pinturas ke puedian merkar en sintiendosen orgoliozos.
Ademas, en akeya epoka, los ollandezos se viyan komo el Israel muevo, i viyan Espanya komo el tirano kruelo. Kon la estoria de la selebrasion de Purim, los ollandezos puedian eksplikar el mirakolo del Dio en sus propria jenerasion.
En la revolusion de Ollanda kontra Espanya, los lideres de la revolusion fueron identifikados kon los lideres de la Bibla, i los tiranos fueron identifikados kon Faraon, Aman, i Nabukodonasor. Los ollandezos estavan komparando sus pais a la tierra de Kenaan.
Por munchos anyos, los artistos ollandezos kompararon los ollandezos kon los judios de Persia. Ester i Mordehai fueron modeles de endependensia. El livro de Ester fue el prensipal sujeto de los artistos ollandezos. Teatros prezantaron ovras bazadas en el Livro de Ester. Un oratorio kon el nombre de Ester fue kompozado por Handel. El famozo poeto ollandezo Van den Vondel eskrivio dos poemas bazadas en la estoria de Esther.
Por munchos anyos, Esther i Mordehai fueron la personifikasion de los ollandezos buenos.
