Irvin MANDEL, el karikaturisto del jurnal Şalom, izo pasar a la vida una seria de karikaturas nomada, La Famiya MOZOTROS.
Estamos fyestando el 30en anyo de Mozotros. Esto fue una transmisyon ininterrompida ke fue fyestado kon un album spesyal i una ekspozisyon.
İrvin Mandel empeso a desinar esta famiya Mozotros en el anyo 1992. Inisyalamente enspirado por los eventos ridikulos ke observo en su entorno i en la sosyeta djudiya, empeso a azer karikaturas. El byervo Mozotros tyene komo senso en ladino, los muestros.
Oy, los personajes de las karikaturas de Mandel reprezentan no solo los evenementos komikos de la sosyeta djudiya, tambyen la sosyeta de los burjuvas.
El tyene unos kuantos livros sovre este sujeto. Todas las karikaturas son echas de su imajinasyon. Los livros son bazados sovre divertimyentos i shakaikas.
A Mandel en uno de sus reportajes le aviyan demandado kualo sinyifika el nombre İrvin. El respondyo ke no lo save, ma miro en Google i topo unas kuantas sinyifikasyones komo: amigo de mar, amigo de puerko, rio vedre, grasyozo etc… Le demandaron kualo sinyifika su alkunya? İrvin respondyo ke Mandel tyene komo senso en aleman: Almendra. Es una alkunya propajada en los djudyos alemanes ke los konsideran komo Ashkenazes.
Otra demanda: kualo te estas sintyendo ke tyenes este nombre etranjero en la Turkiya? Muy difisil. En primero me aziya pena, ma agora me esto engleneando kuando las personas no estan dizyendo djusto mi nombre. Yo so muy sensible sovre el sujeto de desinar shakaikas, i tomar al pelo. Burlarse del den frente, kon shakas no es la mizma koza. Yo no ofendo el den frente, tambyen no lo arrebasho, no lo menospresyo.
Empesi a desinar en el anyo 1985 en el jurnal Şalom. Esto desinando sovre la vida de kadal dia, las fyestas, el anyo muevo i otros sujetos.
Apartener al jurnal Şalom komo un desinator de kariaturas, kualo te esta eksprimyendo? El Şalom se esta desvelopando de dia en dia. Es un jurnal seryozo, de konfiensya, amator ma estan azyendo kozas profesyonalamente.
La Famiya Mozotros eskrito en djudeo-espanyol es el primer i el solo livro de karikatur en Judeo-Espanyol en el mundo. Esta ovra es muy emportante porke aze konoser las partidas spirituales de la kultura Sefaradi Turka.
Esta ovra es el rezultado de las maraviyozas observasyones de İrvin Mandel refletando el ekstraordinaryo umor sefaradi turko.
