La primera sientifika Turka a ser elejida komo miembro de la Akademia Nasional de Siensias de los Estados Unidos, İvet Bahar, es el orgolyo de la Turkiya.
Konosida komo shefe fundadora del Departamento de Biolojiya de Sistemes Asistados por Ordinadores en la Universidad de Pittsburgh, es en mizmo tiempo kargada de la konsepsion de melezinas (kuras).
Despues ke fue elijida a la Akademia la mas prestijioza de los Estados Unidos, disho en un komunikado a este sujeto:
"Esta eleksion sinyifika ke las investigasiones ke ize fina oy fueron akseptadas por una institusion sientifika respektada. Es una grande onor, absolutamente."
Miembro de la Organizasion Evropea de la Biolojia Molekular (EMBO) de la Akademia de Siensias (BA) i del Komite de Revizion de Siensas Fizikas i Injeneria del Konsilio Evropeo de Investigasion (ERC), Bahar tiene mas de 250 artikolos en biolojia komputasional.
Avriendo muevos orizontes en biolojia molekular kon sus estudios i revelando ke las proteínas tienen la kapachidad de adaptarsen a interaksiones i mutasiones estrukturales, Prof. Bahar trusho muevas perspektivas en la lucha kontra las hazinuras neurodejenerativas i la toksimania kon su lavoro en los ultimos anyos.
Fue invitada a la Kaza Blanka komo oratrisa por el Prezidente Barack Obama en 2016 i en su diskorso intitulado: “Modelizasion multi-eskala i Big Data en la biolojia", ekspliko komo, kon la teknolojia de “superordinadores”, se puedia azer de manera mas presiza i mas rapida, las simulasiones molekulares i selulares uzadas en la konsepsion de kuras, ke no se puedian realizar antes.
Felisitasiones, İvet Bahar
