Oy noche de Alhad esto eskrivyendo mi artikolo despues de asistir a dos zoomes. El primer de los Enkontros de Alhad i un segundo ande Rachel Bortnick avlo serka de una ora, esta vez en Turko. Reelmente fue un diya muy kargado. I diya entero esto sigiendo la televizyon ande kada punto estamos oyendo novedades sovre la gerra entre la Rusia i la Ukrania. En esta epoka, una gerra asemejante es reelmente muy danjoroza. Kon esto todos mos embezamos ke el prezidente de la Republika Ukrayneza, el sinyor Volodimir Zelenski es djudyo i ke los ermanos del granpapa fueron matados en los kampos de eksterminasion. I su granpapa es el solo ke reusho a sovrebivir. Es kazado kon una amiga de la eskola i kreo ke no es djudia. I mos ambezimos ke izo vaftizar sus kriaturas komo kristianos.
I savemos ke la Ukrania tyene una komunidad Djudia bastante ancha i savemos ke fueron las personas ke partisiparon a la Komunidad Djudia de Alemanya. Oy en diya, la Alemanya tyene una Komunidad Djudia bastante ancha es kon la prezensia de los Djudios Rusos i Ukraniesos.
De la otra vanda todos estamos kontra Putin porke es el ke empeso esta gerra, i no kere ke Zelenski esté en el poder, porke es un ombre liberal i demokrato. I Volodimir no kere un rejim komo la Rusia.
Agora empesaron a kontar otras konsejas sovre Putin. La primera es ke un soldado tornando de la segunda gerra mondial a la Rusia, serka de su kaza ve una araba ande estan transportando muertos en un kamyon. I el soldado ve en los pyezes de una mujer los kalsados ke avia merkado a su mujer. Pensa! Ke me vaya a kaza para mirar a mi mujer? I dize al ombre: kreo ke esta mujer muerta es la miya. Me la das para ke la enterre kon mis manos? El ombre acheta. I reelmente es su mujer. I la toma. I ve ke esta respirando. Immediatamente la yeva al ospital. I esta mujer va ser la madre de Vladimir Putin. En el livro de Hilary Clinton, kontan otra konseja. La famiya de Vladimir eran muy proves i lavoravan munchas oras para mantenersen i mantener sus kriaturas. Vladimir nasio en el 1952 i kuando era chiko, no teniya pan para komer. Tenian vizinos Djudios i kada diya la mujer de la kaza dava a komer a Vladimir. Le demandavan si tenia ambre? I nunka disho ke teniya ambre, ma komiya lo ke le davan. Un diya asendyendo las kandelas de la Hanukiya kuando era presidente konto esto todo, mizmo disho a los ke se topavan ke se akodra mizmo de la beraha de Şabat.
Lo ke no esta eskrito en el livro es ke esta mujer despues ke se muryo, el marido izo su aliya a Israel. I Putin una vez ke se fue a Israel lo vijito i le merko una kaza en Israel. Es Djusto o es una mitolojia, no lo se. Ma me esta viniendo muy umano este akto espesyalmente para Putin.
Dingunos no pensavan ke un komedyeno komo Zelenski va ser tan korajozo para protejar su pais i dar koraje al puevlo. Oy despues de midi dyeron karar de asentarsen en una meza i sin dinguna kondision. Reelmente esto es la viktorya de Zelenski i de la Ukrania. Auguramos PAS entre los dos payises. Si no, va ser una dezgrasia para el mundo entero.
