El ocho del Marso es el Diya Enternasional de la Mujeres. En este diya, las mujeres se entretienen, enjektan enerjia de unas a las otras i selebran sus suksesos.
En el mundo, ay munchos paizes ande las mujeres no son tratadas komo iguales kon los ombres. Este diya prokura una platforma para trokar este komporto. Oy, en los paizes developados, las mas grandes korporasiones son dirijadas por mujeres. Las mujeres del oeste son diferentes de las mujeres del este. En el oeste, la majorita de las mujeres arivaron a la parte superior de sus karieras.
Este diya es una grande okazion para las mujeres para ke se rankontren. Oy, en el mundo de negosio, de diya en diya, mas munchos postos superiores son okupados por mujeres. En la politika, las mujeres estan ganando pozisiones superiores.
En los anyos dalkavo, uvo un grande progreso en la pozision de las mujeres en munchos kampos. Ma, malorozamente dainda, en paizes atrazados, las mujeres no tienen akseso a una edukasion; eyas dainda biven kon espanto, no tienen seguridad en las kayes. En estos paizes, kada mujer kale ke partisipe en esta lucha mas muncho de las otras, para arivar a obtener sus derechos.
El Diya de la Mujeres es un mesaje al mundo entero. Este diya es un mesaje de progreso, un mesaje de esperansa i de apresiasion. El mas grande progreso de la mujer es la edukasion. En munchos paizes, no kedo mas ijas ke no se vaygan a la Universidad.
En los paizes atrazados, las mujeres tienen menester de koraje para bushkar sus derechos. Kale amostrarles las oportunidades ke ay para eyas, para pueder developarsen. Kada paso es emportante. Oy ay munchas posibilidades para ke puedan trokar. Antes de todo, kale edukar el puevlo inyorente. Kada governo kale ke kite leyes para protejar las mujeres i para darles derechos iguales kon los ombres. Kale permeter a la mujer ke avle, ke pueda dizir lo ke kere. En este diya, el mundo entero deve de selebrar el koraje i la determinasion de la mujer para obtener sus derechos.
La mitad de la populasion en el mundo son las mujeres, ma dainda no tienen las mezmas posibilidades de los ombres. Las mujeres tienen dainda un largo kamino de kaminar para reushir. En munchas komunidades, las mujeres dainda no tienen ‘’Boz’’. No pueden dizir sus menesteres ni sus opiniones. El ocho del Marso es el diya de akodrarmos de estas mujeres i de ayudarles para ke ke empesen a luchar.
Kaminimos un largo kamino en los anyos dalkavo i obtuvimos munchas kozas ke no puediyamos azer antes. Antes, las ijas kaliya ke gerreyaran kon sus padres para pueder ir a las univerdidades. Kuando eskapavan el lise, la sola koza ke puediyan azer era de kazarsen i tener kreaturas. Oy, en munchos paizes, la mujer puede tener una kariera i tener famiya en mezmo tiempo. Oy, las mansevas lavoran kon sus koleges ombres, los edukan a komportarsen komo igual kon eyas. Las mansevas ambisiozas pueden obtener lo ke keren.
Dingunos no mos va dar muestros derechos. Kale "kerer muncho" i lavorar para obtenerlo. Las mujeres deven de amostrar ke pueden reushir en kada kampo komo los ombres, ma en akseptando las diferensias entre los dos jeneros. Kada mujer kale ke tenga konfidensia en si, i deve ayudar a las otras, para ke puedan realizar sus eshuenyos.
