Keridos todos. De todas las vandas estamos bivyendo diyas muy aktivos. Todos ya savesh ke diya de myerkoles va ser el tredjen o el katorzen diya de la gerra entre la Ukrania i la Rusia. Reelmente fue una gerra muy salvaje. La Rusia kreo ke kere tornar a la epoka de las Republikas Unidas. Ma el Sinyor Putin no kere entender ke dingunos no keren mas bivir esta epoka. Ma komo esta bastante poderoso, esta kreando todo modo de problemes para reushir. Espero ke la pas va ser el resultado de esta gerra.
La semana pasada, diyas de Shabat i Alhad en las islas se realizo el Festival de las Mimozas, flores amariyas ke tyenen una golor partikular i ke se emplean mizmo para syertas hazinuras. Ya savemos ke estas flores egzisten en las islas. I las personas arankan estas flores para venderlas en Estanbol. Dingunos dainda no entendyeron ke estas flores deven de estar en los arvoles de mimoza i no en los vazos. En este festival mos kontaron lo ke se esta realizando en la isla de Büyükada. Dos dammas, Eva Kent i Sayın Bilallar mos kontaron lo ke izyeron por las islas. Komo ne keren ke se venda artikolos artifisiales en las islas, empesaron a sembrar flores de lavanta en los terrenos de syertos partikulares para azer kon las mujeres de las islas syertos ornamentos para vender. En esta aktivitad, tomaron lugar syertas mujeres ke izieron artikolos para vender. I reusheron. Las dammas tenyendo kontakto kon la munisipalidad de las islas i de Estanbol reusheron a tener un kampo de 5 o 6.000 m2 ande se topa sapinos, syertos de 230 anyos. I en este terreno dyeron karar de realisar un arboratium i sembrar mimozas i lavantas. Sembrar para azer lavorar las mujeres de las islas. Ya savemos ke las mimozas no son flores de las islas. Ma savemos ke las islas tyenen una tyerra bastante fertil i por esta razon vemos ke en las islas estas plantas estan topando vida. Espero ke el anyo ke viene vamos a pueder respirar en este terreno ke se topa en el Maden de Büyükada. I vamos a ver arvoles de mimoza i flores de lavanta.
Esta semana va ser unos diyas muy emportantes para las relasyonas Turko-Israelianas. El Prezidente de la Republika Israelyana, Herzog va vinir a Ankara para vijitar la Turkiya. I despues va vinir a Estanbol i va vijitar la Sinagoga de Neve Shalom i los Djudios d’Estanbol. I despues va vijitar muestro Muzeo ke se topa djusto al lado de la Sinagoga de Neve Shalom. Kreo ke es el sinken presidente Israelyano ke va vinir a vijitar la Turkia. El primer fue İsak Navon. Ma kreo ke no era una vijita ofisial. El segundo fue la vijita de Erez Weisman (Novembre 1996). I despues vinieron Moshe Katsav (Julio 2003) i Shimon Peres (Novembre 2007). Ofisial o no, esta va ser la sinkena. Kreo ke en esta epoka, esta vijita tyene una grande emportansa. Las relasyones ofisiales no son muy famozas entre los dos payizes; ma de punto de vista ekonomika, todo kamina muy bien. A la fin de este mez tenemos una vijita ofisial a Israel kon el prezidente de la Munisipalidad de Edirne i un grupo ke lavoran en la munisipalitad; i reelmente lavorimos muncho para topar un avion. Kada diya ay 12 vuelos entre Estanbol i Tel Aviv (en una vanda, i 24 en las dos vandas kon Turkish Airline o Pegasus). Reelmente es una relasion muy enteresante. Es djusto ke la grande partida de los ke bolan de Tel Aviv a Estanbol son Israelyanos Djudios, Kristianos o Muzulmanos ke kontinuan a bolar a la Evropa o a las Amerikas kon el Turkish Airlines o el Pegasus.
Vos va kontar las semanas ke vienen sovre la vijita del Prezidente Israelyano Herzog. I despues sovre muestra vijita a Israel.
