Segun los akademikos de la Tora, el festival de Purim, no tiene sus raises en la istorya ke se eskrive en el Livro de Ester. Hayim Schauss dize ke Purim empeso a ser selebrado en primero entre los Djudyos de Persya tomando esta tradisyon de los vizinos ke no eran djudyos. En Persya selebravan un festival en el mez dalkavo del invyerno, kon maskas, bayles, alegría, djugos i shakas, para resivir la primavera ke va anunsyar el renasimyento de la Natura. Un festival muy paresido al festival de Diyonizos selebrado por los Gregos i Romanos de la antikuedad. Komo Diyonizos era el dyo del vino, en este festival se beviya vino para emborracharse. Al pareser ke este uzo de vino entro en las kostumbres de los Persos i los Djudyos de Persya izyeron la mizma koza. No olvidar ke en Purim dizimos “Ad lo yada” ke kere dizir bever vino asta no pueder saver entre el ilo blanko i el ilo preto. Oy, los festivales muy famozos de Rio i de Venezya ke se azen kaji en la mizma epoka, tyenen sus raises en estas kostumbres de la antikuedad.
Theodore Gaster, en su livro “FESTİVALES DEL ANYO DJUDYO” avla de varyas teoriyas sovre Purim i una de eyas es ke Purim vyene del “Festival de anyo muevo” en Babilonya. Al pareser ke en este festival los dyozes desidiyan el destino del ombre i esta desizyon se aziya kon loteriya. Esta palavra en la lingua de Babilonya era “PURU”, rais muy paresida a “Purim”. En este festival imitavan los dyozes ke se burlavan i aziyan pantomima de otros dyozes afuera de Babilonya.
Otra teoriya dize ke antes, para Purim, empleyavan otra plavra: "Furdaya”. I el istoryador djudyo Jozefus empleyava la mizma palavra ke al pareser deriva de la palavra persana "Farvadigan”, fiesta ke se aziya kon vino verso finales del mez de Marso.
Una otra teoriya dize ke la palavra “Purim”puede vinir de la palavra ivrit “Purah”, relasyonado kon vino; i es derivado del festival grego “Pithoigia”, festival de avrir los variles de vino. Este festival empeso a azerse en otonyo, paso a ser echo en el ekinoks de la primavera, lo ke korresponde a la epoka de Purim. Ama Gaster aze esta deduksyon: La istorya de Ester no es una istorya verdadera i su relasyon kon la fyesta de Purim tiene elementos paresidos kon la fiesta grega komo la seleksyon de una Reyna; “Ester”; la resepsyon de uno del puevlo ke paso por rey; “Mordehay en los kaminos de Shushan”; el tanid; “Tanid Ester”; la egzekusyon del malo; “la egzekusyon de Aman”;
De toda forma la istorya del festival de Purim, entro en muestras tradisyones no antes del sigundo siglo de MA (Muestra Era). Otra tradisyon es ke en Purim mos damos regalikos unos a los otros i mos akodramos de los ke tienen nesesidad para ayudarlos kon lo ke puedemos.
Purim Alegre para todos.
Fuente : Rabi Ron Isaacs
