Esta semana estamos fiestando una fiesta alegre. Vash a dizir todas las fiestas son alegres ma esta fiesta en partikular es alegre.
Antes kuando biviyamos todos en el doredor de la Kula o en Galata se viya esta alegriya. Se biviya. Siguro los ijikos i las ijikas se alegravan mas muncho. De diyas antes se ampesava a aparejar lo ke mos ivamos a vistir. Akel tiempo muestra imajinasyon no era apoyada por las televizyones o medyas. Las vistimyentas se aziyan en kaza. Agora ya estan prontas para kada boy.
Kada asosyasyon aziya balos diferentes. El Amikal aziya balo para las kriyaturas en el lokal de Asmalı Mescit. Kreyo ke es agora FKD. El Or Ahayim aziya balo en Hilton para los grandes. Me akodro ke los bilyetos eran muy karos. Por ke desparte del presyo del balo, se dava i una donasyon para ayudar al ospital.
Ken se vistiya de zingana, ken de prensesa, ken era kovboy, otras eran balerinas. Si el diya de Purim kayiya entre semana, el balo se aziya el Alhad despues o antes. Akel diya las kalejas estavan yenas de kriyaturas alegres, orozas i karas riyentes. Kualo es ke eran estos balos? Metiyan una muzika i ofriyan dos galetas, una limonata i un pedaso de kek. Espesyalmente davan kek i no gato. Para no enmelar las manos de tanta kriyatura. Los paryentes de los mas grandizikos los deshavan en la puerta i los de los chikos kedavan kon eyos. Una alegriya ke no se puede kontar.
La mizma alegriya la vide yo en un diya de Purim en Israel. Siguro ke paso munchos anyos de mi chikes. Ansina, i las vistimyentas trokaron. Aya ay una industriya de vistimyentas para Purim inimajinavle. Para kada anyo ay un vistido. Me aviya enkantada de ver. Los mansevos i las kriyaturas baylando i kantando en las kayes. Paresiya komo el karnaval de Brazil.
Mizmo si es un diya al anyo, kale fiestarlo porke da un “ferahlik” a la alma. Aparte ke estos dos anyos dalkavo no pudimos fiestar Purim por modo de la pandemiya, kada anyo izimos partis en diversos lugares. En Ortaköy, en una pista de patinaje de buz, en el salon de un otel, en un Klub de Göktürk i mas. Ma no solo los mansevos i ijikos, todos de los 8 a los 80, partisipan a estos partis. En vezes, unos grupos de amigos aparejan skeches komikos entre eyos, en vezes los amigos ke saven muzika, se arekojen i forman una orchestra i kantan en estos partis.
El buto de esto es selebrar el mirakolo de Purim, de akodrarmos de muestros salvadores Mordohay i Ester. I ke “El” mos ayuda i mos salva de situasyones peligrozos, a los ke tyenen kreensya, a los ke lucharon para sus vidas. (Mizmo si es en sekreto, komo “seter” ke esta eskondido en el nombre de Ester.)
