Isaac Herzog, el 10.03.2022 djugeves vijito la sinagoga
Neve-Shalom mizmo ke teniya un program muy kargado.
La Komunidad Djudiya preparo una organizasyon maraviyoza en la sinagoga ke no se puede kontar kon byervos, kale bivirla...
Herzog entro a la sinagoga, entre los dos Prezidentes, Erol Kohen i İshak İbrahimzadeh, el en medyo, delantre i de detras hahames vistidos blankos komo una boda, tanyendo el Shofar, todos en pyes i el grande Rabino en la Teva, todos kantando Heveynu Shalom Alehem i dando palmas. Una resivida muy sentimental ke me izo yorar.
En primero el Grande Rabino, Rav İzak Haleva izo una avla en dizyendo al prezidente i a su mujer: Este dia Santo es un dia ke devemos de ser muy satisfechos de vuestra prezensya.
Esta vijita del Prezidente de Israel a Turkiya ke resivimos komo envitado de onor, semboliza el punto el mas alto de las relasyones de pas i amista entre los dos paizes, desde la kreasyon del Estado de Israel”. “Estimado Presidente, vuestro padre, Hayim Herzog (z.l.), ke vijito muestra komunidad en el anyo 1992 komo Prezidente, desho una trasa profunda en el korason de muestra sosyedad.
Kero dizirvos bienvenidos, kon las berahotes de la Tora…
Ya estamos konsyentes ke sosh un prezidente, amante de la Pas, i malgrado vuestro tyempo limitado, su vijita mos izo muncho plazer.
El Dyo ke vos guadre de todos los males, i la Pas, el repozo i el bien estar ke renye en muestros paizes i en el mundo entero.
Kero ekspresar mis respektos”…
Despues de esta avla, el Prezidente, Isaac Herzog avlo muy sinyifikativo. “Mis Ermanos de la Komunidad Djudiya, mi mujer Mishel i yo estamos muy kontentes de konoservos. En este dia muy spesyal, kero arogar por muestros ermanos de la komunidad de Ukranya, i ke el Dyo Baruhu les ayude i los salve de todos los problemes.
Antes 30 anyos mi padre, Hayim Herzog (z.l.) i mi madre Ora (z.l.) aviyan vijitado la komunidad djudiya de Turkiya para una vijita muy spesyal. Mi padre no era la primera persona ke aviya vinido a Turkiya.
Mi granpapa ke era el grande rabino de Israel, Yitshak Isaac Herzog Allevi (z.l.) i mi tiyo Yaakov (z.l.) aviyan vinido para una misyon espesyal ke era de salvar todos los djudyos de la Evropa. Mi padre i mi tiyo kuando avlavan de la vijita a Turkiya, mos kontavan ke los djudyos aviyan topado un lugar kalmo i repozado aki.
Ermanos i ermanas, a kavza de la asosyasyon del destino, Israel entero es atado kon todos los djudyos del mundo kon una grande responsabilidad. Myembros de la komunidad djudiya estash dando un egzempyo perfekto i sosh un model para todos. Tengo una satisfaksyon de las otoridades por la seguridad i la liberta de los djudyos de Turkiya.
Keridos, ayer en Ankara tuve el plazer de vijitar el Prezidente, Recep Tayyip Erdoğan, ke fue una vijita istorika.
Tuvimos una konversasyon agradavle i onesta. Le ekspliki ke las relasyones entre la Turkiya i Israel son muy emportantes para mi, i ke puedemos bivir entre pas i amor todas las relijyones del Medio Oriente. Me alegri de oyir de su boka ke está de la mizma idea kon mi.
Keridos aliados, muestro mundo tyene menester de ser en pas lo mas muncho posivle. Mas Pas, i manko gerra, trajediya i lucha.
El Dyo va krear la pas para el puevlo de Israel, i el mundo entero. Amen…"
A la fin, el grande rabino i los dos prezidentes le ofryeron regalos i vijitaron el muzeo djudyo endjuntos. Fue una vijita reushida kon relasyones kayentes i entimas. Kero remersyar la komunidad djudiya ke organizo esta resivida de una manera perfekta. Se puede dizir ke era komo una boda istorika.
