En mi chikes para paseyar saliyamos a Pera o al Bosfor. Mos plaziya kaminar kon la famiya, yo kon mi padre i mi ermano kon la mama. Lado kon lado. Avlavamos, charlavamos riyiyamos. Apenas teniyamos 6-10 anyos. La famiya por mozos era un sható seguro i muy kayente. Kaminando a pye la mas ermoza koza era ke mi padre tomava mi mano chikitika aryento de su mano segura i para ke no me yele metiya endjuntos en su aldikera. Komo un sentimyento ke mos desho “en Ganeden ke Esten” nunka no se va de mis rekuerdos.
Dande me vino esto al tino? I me se esperto los sentimyentos de mi korason? En los diyas pasados me fui a la eskola de mi inyeta para tomarla apenas kada tadre. I eya tiene 6 anyos. Un diya estava bien yelado. Salyo de la puerta de la eskola kon rizas. Se metio las guantes. Se estava yelando. Le dishe dame la manika. Munchas tadres el padre la tomava de la eskola o la yevava. El estava leshos, en un viaje del echo. Por esta razon, yo me estava indo a tomarla. Me disho la chika kada demanyana mi padre toma mi mano i la mete en su aldikera. Hich no me yelo.
Los anyos pasa. La vida se troka. El modo de bivir se puede trokar. Ma la umanidad se troka muy poko. En el mundo solo es el benadam ke tyene ovligasyon de ser muhtach a sus padres. Muy tadre se puede despartar de sus abueIos. Esta ovligasyon fragua la personalidad. En mismo tyempo es una fragua sin kondisyones. Las personas de la famiya se dan valor de parte a parte. Fraguan una konfiyensa propyo de parte a parte. Fraguan una komunikasyon aryento de la konfiyensa. Yene lo va repetar ke esto es la fragua de la personalidad. Una buena persona syempre tyene kapachidad de fraguar famiyas ke biven debasho del tejado de konfiyensa i de amor.
El poeta Ataol Behramoğlu mos dize:
Madre es la vinya ke paseas,
Padre es la montanya ande te arrimas tu espalda!
La mas ermoza epoka de tu vida,
Es la epoka ke pasas kon tu papa i mama!
Anne gezindiğin bağ baba yaslandığın dağdır! Ömrümün en güzel çağı, annen ve babanla olandır. ATAOL BEHRAMOĞLU
