Estos diyas ke fiestamos Purim i avlamos de la megila de Ester, vos kero eskrivir sovre otra megila, ke mos konta la dezgrasya ke uvo el tiempo de los nazistos.
El Muzeo Judio de Maroko (Fas) es el uniko muzeo judio, en un payis muzulmano (aparte del Muzeo judio de Estambol) ke tiene una grande komunidad de 2500 personas. En este muzeo se topa una megila yamada “Megilat Hitler”, egzaktamente eskrita en el estilo de la megila de Ester. Fue eskrita por un judio de Maroko, un profesor de ebreo, Asher Hassine. Mos konta la sufriyisyon de los judios de la Afrika del Norte, por el rejimen de los alemanes nazistos. En 2019, el artisto judio de opera David Serero, izo una donasyon de su grande koleksyon de arte. Esto fue la mas grande donasyon de objektos judaikos.
Vendremos a la “Megilat Hitler”. Esta megila tiene siete kapitulos i es eskrita al estilo de Megilat Ester. Hassine mos konto todos los evenimientos del Olokosto, desde la vinida de Hitler al poder, en pasando por la okupasyon de la Evropa, matansina de los judios, arevatando sus bienes. Los tres kapitulos dalkavos fueron eskritos despues de la liberasyon del Maroko i dedikados a la istorya de los judios de la Afrika del Norte i a sus liberasyones por los aliados.
Malgrado ke Hassine eskrivio esta megila en mostrando un paralelo a los eventos de la megila tradisyonal de Ester, komo ivan a ser destruidos los judios de Shushan por Aman, dize ke esto no fue una istoria alegre, ke no tiene un final alegre. Dize ke kale meldarla kon seriozita en akodrandomos de las viktimas. Hassine mos propoza de fiestar kada 11 Noviembre, la fin de la Primera Gerra Mundiala, i fiestar un “Purim Katan” a esta okazyon.
Esta kopia de “Megilat Hitler” ke se konserva enrolada endjuntos kon una Megilat Ester, aparteniya a la famiya Corcos ke fuyo de Floransa a Kazablanka en 1939 achakes ke aviya restriksyones rasistas ke fueron empozadas a los judios de Italia. En 1940, los ombres de Corcos fueron internados por primera ves en los kampos de prizonieros de gerra. Despues ke en Fransia vino al poder el rejimen de Vichy, todos estos prizonieros fueron liberados. Viendo ke estan en perikolo en la Evropa, toparon el mas siguro lugar, la Afrika del Norte, ke estava liberado por los aliados. Ma komo estos ke fuyeron eran italyanos, fueron de muevo aprezados aya. Penaron muncho para konvenser las otoridades ke eyos eran judios inosentes i eran eyos mizmos las viktimas de la Italia fashista.
Despues de la gerra, la famiya Corcos emigro a Eretz Israel.
