En mi chikes, apenas eskapava Purim, en las kazas empesava un movimyento. En primero era enkalar la kaza i despues kon sira, azer kashones i kantones, lavar las mantas, dar los kolchones al hallach. Mi nona ya empesava azer planos del seder de pesah. Kuando se aserkavan los diyas, era majar la muez, pasar la prasa por el tropito, eskaldar espinakas, kuantos kilos tomava mi madre no se, me akodro en tres legenes blankos ke eran legenes de pesah, avia tanta espinaka ke no topava de pensar kualo se va azer. Entrar al mupak era defendido, no seya ke mesklemos el hamets al kasher. El haroset por siguro se azia en kaza komo todo lo ke se komiya. Fritadas de todas maneras porke en la kaye no se beviya ni agua. No aviya nada pronto, ni cateringes ni nada. Diya de kalhamira era kemar la migita del pan, aparejar la meza del seder de pesah ke aresiviyamos lo mas poko vente, vente i sinko almas, ir al banyo, vistir lo muevo ke mos merkaron i los kalsados de lustrin. Koza kuryoza, penavan i no se keshavan de kanserya. Ke pekado ke las kriaturas de oy no syenten esta emosyon, porke no ay menester ke venga moed, ya tyenen todo en la mano kon su demaziya la ora ke keren, i kon tanto konfor no estan tantos orozos komo eramos mozos.
Mi madre tenia uzo de mandar gatós de pesah a los ke no pudian azer. I por esto mi papa traiya a kaza 200 guevos. Parese ke akel tyempo dingunos no teniyan kolesterol! Kreygo ke en dinguna nasyon mas de mozos los djudyos, no egziste emplear 200 guevos en una semana.
Agora no ay ni majar la muez ni pasar la prasa por el tripito. Kon un robot no esta sureyando ni sinko puntos; el haroset, si no keres penar, kon un telefon te vyene fin la puerta de tu kaza, la espinaka no se kere dicho, ay paketos prontos, mundada i lavada, mas mijor ay un suri de cateringes ke te esta enbiyando todo fina kaza mezmo los chinis, pirones, kuchiyos i kucharas. No ay estrenar kalsados de lustrin ni vistimyentas muevas de moed. Malorozamente kon estos todos kolaylikes, no ay pransos de trenta personas.
Akeos tyempos uno si me diziya ke un diya, noche de pesah vamos a komer solos kon un tifsin enfrente el zoom, diziya este peryo el meoyo. Ay dos anyos ke estamos pasando los moedes esta manera. Por siguro no es lo keremos mozos si no es lo ke kere el dyo Santo.
Komo dize la dicha: “Kuando el benadam aze planos, el Dyo se riye”.
Inshalla este anyo, sin sar i sin mal, vamos a estar kon los keridos todos endjuntos en el seder de pesah alegres i gustozos.
Planos Buenos.
