No pasa un diya sin meldar en la prensa nasyonal o internasyonal el nombre de Rothschild. Este nombre, el nombre Rothschild mos da un sentido de rikeza i fama. Ma por otros syertos, este nombre se topa en el sentro de teoriyas, de komplotos i ademas, es un manadero de antisemitizmo. La Kaza de Rothschild fue (i dayinda es) una de las fuersas finansyeras mas poderozas de la Evropa del siglo XIX, i syertos myembros de la famiya obtuvyeron titulos de nobilidad.
La istorya de los Rothschild empeso kon Mayer Amschel Rothschild, ke nasyo el 23 de Febrayo de 1744 en la sivdad almana de Frankfurt-am-Main. Su padre, Amschel Moses, era komersante i trokador de dovizes. La famiya se aviya konosido kon el nombre de Rothschild durante varias jenerasyones i se yamaron ansi porke un tyempo, bivyeron en una kaza ke teniya una marka de un eskudo kolorado.
En 1755, Meyer Rothschild kedo guerfano. Despues de eskapar su edukasyon en la eskola djudia de Fürth, Rothschild se fue a Hannover i aya topo un posto en la firma de finansas i banka de Oppenheim. Se adelanto en los sujetos de banka i finansas durante este posto. Ma kuando se desidyo de lavorar a su kuento, torno a un sujeto ke se aviya ambezado de su padre: el komersyo i kambiyo de monedas. En la grande mayoriya de la Almanya aviya una grande nesesidad de kambistos, porke kada provinsya teniya sus propyas monedas. Rothschild, se spesyalizo en monedas raras i en kurto tyempo se izo una reputasyon tan ekselente ke a la fin atiro la atansyon del eredador del trono Wilhelm de Hesse i afilu se izo su prensipal negosyador. Despues ke Wilhelm de Hesse paso al trono i se izo Wilhelm IX, el Prens Hesse-Cessel, Rothschild empeso a ayudarlo kon munchas de sus grandes nesesidades finansyeras i bankeres, un negosyo bastante lukrativo dado la ekportasyon de mersenaryos de Hesse, de Hesse-Cessel. (“Los mersenaryos de Hesse” era una fuerza armada almana de kaji de 30.000 soldados ke ayudaron a los Inglezes durante la revolusyon en la Amerika).
Ma se puede dizir ke la mas grande rikeza de Rothschild, fueron sus ijos. Mando a sus sinko ijos a sinko importantes sivdades de la Evropa. Su ijo grande, Amschel Mayer, se kedo en Frankfurt-am-Main. Salomon se fue a Viena, Nathan a Londra, Calmann (Carl) a Napoli i Jacob (James) a Paris. Rothschild tambyen tuvo sinko ijas.
Komo haveres de famiya i de komersyos, los Rothschild teniyan una grande kapachidad de movimyento: pudyeron mandar a sus mesajeros aryento i afuera de los paizes kon una grande prestura. Sus lokasyones enternasyonales les permityeron de lavorar djuntos i independientemente, lo ke fue partikularmente provechozo durante las Gerras Napoleonikas.
Meyer Amschel Rothschild, a ken algunos nomaron “El padre de las finansaz internasyonales”, muryo el 19 de Septembre de 1812.
