Si estash meldando el Şalom i la oja del Judeo-Espanyol, ya vitesh ke la semana pasada no eskrivi mi artikolo. No so komo el palyacho ke sale a la shena unas kuantas oras despues ke se le muryo la madre o el padre. La semana pasada malorozamente diya de vyernes, se muryo mi madre ke estava en el ospital los dos mezes dalkavo. Es djusto ke mi madre tenia 93 anyos; ma la disparision de una madre es una disparision muy emportante para un ijo o una ija. Tengo una ermana ke es tres anyos mas aedada de mi. Ke su alma repoze en Gan Eden, mi madre tuvo el mazal de ver sus inyetos i sus bis inyetos. Tenia kuatro bis inyetos/tas de 22, 20, 16 i de 7 anyos. Diya de alhad antes del DIDL teniyamos el Korte de siete.
Despues, kuando torni a kaza, tenia un alay de mesajes i de whatsappes para meldar i responder. I despues pude segir el DIDL. Es Karen, Emel, Alberto i unas kuantas personas ke se okuparon para la realizasion. Es Edna del Şalom ke reusho a topar syertas publisidades para dar apoyo a esta emision. Los ke aparejaron programes en esta emision komo Seyfi İşman, Süzet Herman, Anna Eskenazi i Kenan Cruz lavoraron para ke todos puedan segir el program tomando plazer. I tomaron. Empesando el DIDL vimos ke en unos kuantos puntos la djente no alkanso a entrar en el “zoom”. Tenemos un zoom ke empleamos endjuntos kon el Muzeo Djudio. Ma no demandimos al muzeo “Kuantas personas pueden partisipar?”. Normalmente la kapachita es de syen personas; ma si ay syertos programes, lo estamos elevando a 500 o 1.000 personas. Esta semana komo estava okupado i no me demandaron, empesimos kon 100 personas, ma en una medya ora 500 personas puediyan segir el DIDL en el zoom. I kreo ke serka de 170 personas entraron. Demandi a Karen i Emel para saver kuantas personas estavan el el FACE? Emel me embiyo un grafik ande vemos el shifro de 1.069. Yo esto kontente de este rezultado. Si no puditesh verlo, devesh de saver ke este diya fue dedikado a la memoria de muestro amigo, Henri Çiprut ke mos desho la vida unos kuantos mezes antes. Era uno de los mas mansevos de muestro grupo. I teniyamos de menester de su apoyo para el futuro. Ke su alma repoze en Gan Eden.
Kero felisitar a Suzet Herman i Anna Eskenazi por sus kapachetad de topar kada anyo kozas muevas para kontarmos. I Seyfi İşman, profesyonel de filmos, reusho a kontarmos munchas kozas sovre el umor Djudio en el Sinema. Kreo ke no era muy fasil de realizar una prezentasion asemejante.
Vos kero kontar sovre la vijita de los miembros de Göztepe ke se fueron diya de Alhad, 250 personas a Edirne. I fyestaron la fiesta de Purim aya en la Grande Sinagoga de Edirne. Estavan endjuntos kon muestro Rav İzak Peres. Mizmo el Mayor de Edirne i syertas personas ke lavoran en la Munisipalidad partisiparon a este diya kon sus mujeres o maridos i sus kriaturas ke les plazyo lo ke realizaron azyendo karatulas / maskas en papel o en karton. Reelmente los devo de felisitar a los ke organizaron este diya por sus esforsos. I puedesh ser siguros ke este diya reushido fue muy emportante para los dirijentes de la Asosiasion i para los miembros ke partisiparon. Ay dos anyos ke no tenemos un moral bastante alto kon esta korona. Los ke partisiparon pudieron estar en un kal ke tyene una guerta i tenian el syelo ensima de la guerta. No es mas posivle en Estanbol. Los ke partisiparon fueron muy kontentes de pueder vijitar la sivdad i el Charshi de Edirne. Los anyos dalkavo los magazenes estan uzados a ver
