Polonia en el anyo 1886. Doktor Eliezer Zemenhof ke era un doktor judio, espesyalisto de ojos, aresiviya en su klinika, munchos hazinos de lugares diferentes. Uno avlava solo en ruso, el otro avlava en fransez i otros avlavan un poko en lituano. Aviya hazinos etranjeros ke se esforsavan a avlar en polonezo ma lo avlavan tan malo, ke preferava avlarles en sus linguas maternas. El doktor enderechava los ojos de sus pasyentes i en mizmo tiempo sus linguas. Porke el avlava munchas: el yidish, el ruso, el polako, el aleman, el fransez, el lituano, el grego, el ebreo, el latino, el inglez, el italiano i el espanyol.
Eliezer Zemenhof nasyo en el anyo 1859 en Polonia. Su famiya i sus paryentes eran judios. Su entereso en las linguas ampeso desde su manseves. En lo ke estava en el lise, ampeso a pensar a topar una lingua ke va unir a todas las personas del mundo. El estava siguro ke la razon de las gerras eran de manko de komunikasyon entre las personas. Si aviya una lingua komun, todos ivan a entender al de enfrente i ansina no iva kedar malentendimientos.
Zemenhof kuando eskriviya sus artikolos, no metiya debasho su nombre halis. Sinyava komo “Doktor Esperanto” (doktor yeno de esperansa). Por esto kuando invento esta mueva lingua ke se sonyava desde su chikes, la yamo ESPERANTO. Keriya ke el mundo entero se ambeze i avle esta lingua al lado de su lingua maternal.
La lingua ke envento tiene el alfabe latino i una gramatika muy simple. Tiene 16 reglas gramatikas i su vokabulario es bazada sovre pokas raizes. Por esto se puede ambezar presto.
En el anyo 1905, Zemenhof arekojo un Kongreso de Esperanto. En 1908, se establesyo “La Organizasyon Internasyonala del Esperanto”. Sus tres ijos se izieron profesores de Esperanto. Su mujer eskrivio livros sovre la emportansa de esta lingua i los publiko. No se save kuantas personas avlan oy en diya el Esperanto. Asigun el profesor Sidani Kolberg de Washington oy egzisten 1.6 miliones de personas ke avlan esta lingua en un nivel mas karishik de las palavras basikas. Ay tanbien famiyas ke ampesaron a avlar esta lingua en kaza.
En muestros diyas se topan 45 linguistos de la Akademiya de Esperanto ke lavoran sovre las normas i los prinsipios de le lingua. Munchos payises inkluso Israel, mandaron representantes para ambezarsen las reglas dalkavos. El delege de Israel es un astrofiziko, el Profesor Omri Wendel ke avla Esperanto kon sus ijos.
Zemenhof muryo en el anyo 1917 i fue enterrado en el simeteryo judio de Varshova. Sus tres ijos fueron matados en el Olokosto. Solo un inyeto kedo en vida i bive en Fransia.
En Yerushalayim, Haifa, Tel Aviv, Herzeliya i Natanya se topan kalejas al nombre suyo. En Fransia, Lituanya, Polonia i otros lugares del mundo ay kalejas Zemenhof. Kada anyo el 15 Disembre, es su diya de nasimyento, por esto se fiesta este diya en el mundo entero komo “Diya de Eliezer Zemenhof”.
Todos se akodran de el i munchos avlan i penan para propajar esta lingua para un futuro mijor.
