Para pueder bivir orozos, kale pensar pozitivamente i por esto kualo puedemos azer?
Mos espantamos, mos sale bokera en el musho; mos inyervamos, mos suve la tansyon; mos emosyonamos, tenemos dolor de estomago. Esto todo kijo dizir ke todos los estados psikolojikos tyenen una kontra partida en el puerpo.
El pensamyento positivo es un talento ke se puede ganar
de mas tadre, no es la kapachita ke vyene del nasimyento. No es mirar syempre del mizmo punto, es dar un paso atras i ver todo el tabló. Por egzempyo, estamos pensando a una amiga, i despues de unos kuantos minutos, esta amiga mos esta bushkando kon telefon
para demandar hatir. Esto no es una koensidensya. Kije de aryento de korason ke esto se realize, i se realizo.
Si pensamos syempre todo lo bueno, travamos akeyo a muestro lado.
Esto es la ley de la fizika. Por esta kavza el pensamyento pozitivo es
un komportamyento ke la persona puede ambezarse.
- Uzaremos muestro poder para azer byen al den frente.
- Daremos pasos chikos para los butos chikos.
- Tomaremos plazer del mundo, de muestra vida ke esta en muestro doredor.
- Azeremos atansyon a todos los detalyos ke tenemos en el entorno. Esto puede ser una roza golyendo al miskle, un arvole, un pasharo, una vista del nasimyento del dia…
- Amijorear las relasyones kon el den frente i developarlos. Es muy emportante de developar las relasyones kon muestra famiya, kon muestros aliados i kon las personas ke mos azen plazer de avlar, de diskutir.
- Konstruir relasyones fuertes sosyales kon amigos i la famiya, ogmanta la konfiensa en si mizmo.
- Muevos hobis, aktividades, kursos… Saliremos de muestro mundo i avriremos muestro meoyo a muevos espasyos. Por egzempyo, mos ambezaremos a djugar brich, ke es un djugo ke aze lavorar la kavesa, mos iremos a un kurso de fotografia… Avriremos muestro meoyo a muevos espasyos.
- Pensar a las difikultades ke pasimos en la vida, mos yeva a la depresyon i a la dezesperansa. Mos ambezaremos a bivir kon la tristeza ke peryimos a un kerido, kon el stres i la non-reushita.
- Esto todo kualo mos ambezo, kualo puedemos azer?
- Pensar pozitivamente puede trokar muestra vida? Si, en azyendo buendades, en ayudando los menesterozos… Si tenemos voluntad, ambisyon puedemos reushir.
- Eskrivir un livro, un artikolo en un jurnal u en una revista mos aze pensar a kozas buenas, provechozas i esto mos sostyene i mos yeva adelantre.
- El pozitivismo es una forma de pensar, ke una persona deve de kreer en las sirkonstensyas las mas negras, ke ay una koza buena ke se puede realizar. Mizmo el mundo de profesyon aksepta el pensamyento pozitivo, komo un faktor ke amijorea la produktividad de los lavorantes. Oy mizmo, el kamino de la reushidad esta pasando por el pozitivizmo.
- Este penseryo del meoyo, esta kreendo efektos pozitivos en el puerpo. Azer spor, nadar 15 minutos en el dia u kaminar esta tomando el stres de la persona, la jimnastika ke se aze regularamente, el futbol, el basketbol, el voleybol estan eliminando los toksines del puerpo, i la persona esta mas kalma, sin stres i mas pozitivo.
- Komer lo ke es sano, azer una dieta normal, sintir una muzika kalma, azer masaj son los faktores ke yevan las personas a ser orozos.
- Los alimentos non-naturales kon hormones, kon el stres se estan formando en toksines i el puerpo se esta konvertyendo en una bola de toksines.
- El meoyo i el puerpo estan lavorando paralelamente. Kuando el puerpo se deskansa, i el meoyo se deskansa.
Keridos Lektores, embiyaremos syempre pensamyentos pozitivos al universo para ke todo sea pozitivo en el mundo.
