Silva Filiba
Vini mos arekojeremos
I endjuntos arogaremos
No solo del Ayifto la salidura
Ke de la Corona la eskapadura
De la gerra la ansya
De la ekonomiya la dezgrasya
De un mundo de lokura
De sufriyensa i estrechura
Apiyadate de mozotros
Padre Santo Piyadozo
Semos tus kavretikos regalados
Ke mos tomates a tu lado
Kon las dos tavlas de la Ley
Mos atates a tu Fey
Pesah alegre auguraremos
La agada meldaremos
Las kuatro kupas beveremos
Las makotes kontaremos
Dayenu dizeremos
Al shefoh las bozes oyeremos
La puerta grande avriremos
Eliyahu Annavi resiveremos
Ke mos trayga la salvasyon
A nos i a toda la nasyon.
