Los primeros konkistadores espanyoles, pensando ke ay muncha plata en estas tierras, le dieron el nombre Argentina ke viene del latino “Argentum” i en los anyos 1536, la primera persona ke metio su pie a esta parte de Argentina, en Buenos Aires, se yamava Seniora Santa Maria del Buen Ayre.
Antes un mez, mos aprontimos para ir a Sao Paulo, por la boda del ijo de mi ermano. Mi ermano me disho, veni i despues de la seremonia mos iremos a Buenos Aires i Patagonia. Despues de tres dias de Sao Paulo, tomimos el avion i en tres oras estavamos en Buenos Aires. Estuve muy empresionada de ver la beyeza de esta sivdad. Sus avenidas espasiozas, sus konstruksiones grandiozas, sus parkes sin limito, su rio natural i su istoria. La Avenida de 9 julio, ke es la avenida la mas grande del mundo, tiene 140 metros de anchor i 14 bandas para los otomobiles. Dizian siempre ke Buenos Aires es “el Paris” de la Amerika latina, es la verdad. Esta sivdad, kon su esplandor, su estetika i su tendensia para el arte, toka al korason de la persona. Paiz de emigrantes, su mas grande populasion es de orijin Italiana i Espanyola.
Oy, kaji 180.000 judios biven en Argentina i es la mas grande populasion judia de la Amerika Latina i la tresera en las Amerikas. Este shifro era mas de 310.000 en los anyos 1960, porke este paiz empeso a resivir emigrantes desde el siglo XVI, judios i konversos ke fuyeron de la enkizision, i kontinuo por modo del antisemitizmo sin fin, de la Evropa i de otros paizes. Los primeros judios ke emigraron del Imperio Otomano eran judios sirianos i libanezos i despues, en el empesijo del siglo XX, los judios sefaradis. En este grupo de emigrasion, una grande partida de la famiya de mi padre emigraron a Buenos Aires. Para un puevlo ke esta emigrando, saver la lingua del paiz, es empesar la vida kon un pie adelantre. La grande parte fueron komersantes i tuvieron una vida trankila i kon gusto.
La Argentina, fue un paiz muy atraktivo porke en los anyos 1923, era el 10en paiz el mas riko del mundo, oy es el 54en. Kon una ekonomia en kriza desde munchos anyos, el Banko Mundial pensa ke la situasion se ameliorara en los anyos 2022-23. En el tiempo de la “djunta”, entre los anyos 1976-1983, okurro una desgrasia i mas de 30.000 personas desaperesieron. Esto fue una grande mancha en la istoria de la Argentina.
Un dia, si pensash viajar al Amerika del Sud, la Argentina es un paiz ke puedesh tener una satisfaksion sovre vuestros diversos interesos. Oy en dia, kuando se kompara kon los paizes Evropeos i la Amerika del norte, el viaje ariento del paiz, es muncho mas ekonomiko. En mi proksimo artikulo, vos va eskrivir sovre la Patagonia manyifika, su natura mirakuloza i sus sielos resplandesientes.
“Bivir i pueder ver es el mas grande regalo de la vida, i el solo ke puedemos yevar djuntos”
